Speed limit sa CSCR gipatuman

■ AYAW PAKUSOG LAGI: Usa ka traffic enforcer sa Cebu City Traffic Operations Office (CCTO) mipunting og speed gun sa usa ka sakyanan nga nagsubay sa Cebu South Coastal Road (CSCR). Laing sakyanan gipara gilayon sa enforcer, ang drayber gisultihan nga milapas siya sa speed limit nga 60/kph . Estorya sa pahina 2. / gikan sa CCTO FB page
■ AYAW PAKUSOG LAGI: Usa ka traffic enforcer sa Cebu City Traffic Operations Office (CCTO) mipunting og speed gun sa usa ka sakyanan nga nagsubay sa Cebu South Coastal Road (CSCR). Laing sakyanan gipara gilayon sa enforcer, ang drayber gisultihan nga milapas siya sa speed limit nga 60/kph . Estorya sa pahina 2. / gikan sa CCTO FB page



USA ka ba sa mga drayber nga naanad nang mopakusog sa pagpadagan sa Cebu South Coastal Road (CSCR)?

Putol na ang malipayon mong mga adlaw kay gisugdan na ning semanaha sa pagpatuman sa Cebu City Traffic Operations Office (CCTO) ang 60 kilometro matag takna nga speed limit sa tanang matang sa mga sakyanan.

Kon makalapas ka, dako nga multa ug bug-at nga silot ang naghuwat.

Gisugdan kini sa pagpatuman sa CCTO gamit ang usa ka speed gun nga gidala sa usa sa mga traffic enforcer.

Ang pagpatuman sa speed limit gibase sa City Ordinance No. 2621 o ang “An Ordinance Providing for the Speed Limits for All Kinds of Motor Vehicles Within the Territorial Jurisdiction of the City of Cebu” nga gisuwat ni Konsehal Raymond Alvin Garcia.

Si CCTO Spokesperson Paul Gotiong miingon nga ang maximum speed sa SRP 60 kilometer per hour.

MGA SILOT

Ang ordinansa nagpahamtang og P2,000 nga multa ug upat ka oras nga seminar para sa first offense; P2,500 nga multa, upat ka oras nga seminar, ug tulo ka oras nga community service sa ikaduhang paglapas.

Sa ikatulong paglapas, P3,000 nga multa ug pag-impound sa sakyanan alang sa third offense.

Matod ni Gotiong nga gi-testingan lang sa sa CCTO personnel ang usa ka speed gun nga gigamit sa SRP una sila mopalit og daghan pa niini.

Usa sa mga motorista mao sila si Gwen (tinuod nga ngan gipugngan tungod sa hangyo) ug iyang pamilya nga gipara sa mga alas 4 sa hapon niadtong Martes, Septiyembre 7, 2021.

Asoy ni Gwen sa Superbalita Cebu nga samtang nagtadlas sila sa CSCR gikan sa Dakbayan sa Talisay aron manimba sa Basilica Minore del Santo Niño, gipara sila og kalit sa usa ka traffic enforcer.

Gisultihan sila nga milapas sa gitakdang speed limit nga ilang gikakurat, apan wa sila makamulta kay ilang gipasabot ang enforcer.

“Pero nakulbaan sad mi og kadaghan, Sir, kay kalit man gud kaayo,” asoy ni Gwen sa Superbalita Cebu.

TALISAY

Samtang si City of Talisay-Traffic Operations and Development Authority (CT-TODA) head Joy Tumulak nibutyag nga wa pa nila magamit ang ilang upat ka mga speed gun nga gidonar sa usa ka negusyante pipila ka mga buwan ang nakalabay.

Nipasabot si Tumulak sa Superbalita Cebu nga wa pa maaprobahi sa Konseho sa Dakbayan sa Talisay ang ordinansa alang niini.

Ang ordinansahon gipangamahanan ni Konsehal Ferdie Rabaya.

Matod ni Tumulak nga gikinahanglan pa usab ang mga public consultation sa pagpatuman sa speed limit sa ilang habig sa CSCR.

Nipasabot usab siya nga gikinahanglan usab ang rules and regulation kay ang naa nila nga speed gun way camera.

Si Tumulak, kinsa gibansay sa pagdumala sa trapiko sa gawas sa nasod, sama sa South Korea ug Japan, niingon nga mas maayo kon ang speed gun dunay dala nga video camera.

Ang video camera, matod niya, maoy magmatuod ngadto sa drayber nga iyang ang sakyanan ang gipunting sa speed gun maoy gipara tungod sa paglapas.

Matod niya nga masulbad kini pinaagi sa paggamit sa video camera sa cell phone samtang gakupot usab sa speed gun.

Si Tumulak niingon nga kon naa nay ordinansa ug guidelines sa pagpatuman, ilang iimplementar ang 60 kilometro matag takna nga speed limit sa CSCR. (Dugang taho ni REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph