KIDAPAWAN CITY -- Nabalaka naang mga health workers sa probinsiya sa North Cotabato gumikan sa shortage sa medical oxygen.
Kini gumikan sa pagsirit sa kaso sa mga nagpositibo sa coronavirus disease (Covid-19), subay sa kompirmasyon ni Integrated Provincial Health Office (IPHO-Cotabato) Chief Dra. Eva Rabaya.
Mga ospital sa probinsiya nga gikulang sa mga medical oxygen gilangkuban sa mga mosunod: Amado Diaz Foundation Provincial Hospital, Alamada Provincial Community Hospital; Aleosan District Hospital, Arakan Valley District Hospital, M'lang District Hospital, Fr. Tulio Favali Municipal Hospital sa Tulunan, President Roxas Provincial Community Hospital ug Cotabato Provincial Hospital.
Hugtanon karon ang panawagan ni Rabaya sa tanan nga likayan ang pag-adto sa mga dapit nga daghang tawo ug segurohon ang taming batok sa Covid 19.
Kahinumdoman nga tulo ka barangay sa Midsayap ang gipailawom sa granular lockdown sa pagtaas sa mga natakbuyan sa kagaw.
Sa kasamtangan, anaa na sa code red ang probinsiya sa pagtaas sa mga nagpositibo sa Covid-19.