MGA programa ug media practitioners sa GMA 7 Kapuso Network nakadawat og pasidungog gikan sa “Paragala: The Central Luzon Media Awards.”
Ang naghatag sa awards mao ang labing dako nga hugpong sa mga estudyante nga nidayeg sa kakugi sa mga media practitioners sa nagpadayong sangka batok sa Covid19 virus.
Gihimo ang virtual awarding niadtong Agosto 28 ang nadawat ni Kara David ug Joseph Morong ang Crisis Coverage Award: Top News Personality.
Ang “Ako si Patient 2828” nga kasinatian mismo ni Howie Severino nga nataptan sa Covid virus nakadawat sa Outstanding Covid19 Documentary honor.
Ang ubang nidaog mao ang Biyahe ni Drew (Paragala Pang Kultura), Aha! (Paragala Pang Likhaan), Daig Kayo ng Lola Ko (Paragala Pang Pamilya) ug 700 Club (Paragala Pang Kapakanan: Traditional Spiritual Program).
Ang bag-ong Kapuso star, Bea Alonzo nakadawat sa Paragala Pang Lingkod Bayan tungod sa paghatag og paglaum sa komunidad pinaagi sa iyang kapunongan nga “I Am Hope.”
***
Human siya gikuha sa dakong tindahan nga H&M aron mosul-ob sa ilang mga produkto isip modelo, ang Cebuana skateboarder nga si Margielyn Didal gikuha na usab sa Samsung nga usa sa mga sakop sa Team Unstoppable.
Isip bawos sa mga grasyang nadawat, nanghatag og libreng paniudto si Margielyn ngadto sa mga street children sa Cebu City inabagan sa iyang pamilya ug kahigala-an.
Tungod kay batan-on pa si Margielyn, daghan ang nagtuo nga mas daghan pang dungog ang iyang mahatag sa nasud pinaagi sa skateboarding.
Gipasalamatan ni Margielyn ang social media sa tabang niini aron maabot niya ang nahimutangan karon.
***
Gipahibalo na ang Top 30 sa Ms. Universe Philippines nga magtigi sa tablado karong Septiyembre 25.
Duha ka mga Cebuana nga sila si Steffi Rose Aberasturi ug Beatriz Luigi Gomez naapil sa Top 30.
Padayon natong buligan ang duha sa ilang mga paningkamot pinaagi sa atong pag-ampo.
***
Magsugod na ugma, Sept. 11, ang Season 2 sa gikahimut-ang sinemanang komedya ug pampamilya nga programang “Hoy Love You” sa iWantTFC.
Sa susamang adlaw matapos usab sa A2Z, Kapamilya Channel ug uban pa ang Season 1 sa maong serye.
Nagpasalamat sila si Joross Gamboa, Roxanne Guinoo-Yap, Dominic Ochoa, Katrina Bautista, Aljon Mendoza, Carmi Martin, Keanna Reeves, Yamyam Gucong, TJ Valderama, Pepe Herrera, Hasna Cabral ug uban pa sa suporta nga ilang nadawat ug nihangyo nga ipadayon ang pagpaluyo sa Season 2. Si Theodore Boborol ang direktor sa maong sitcom.