HILIG ka ba og adventure trekking ug pagkaligo sa kasapaan apan imo nang nalibot ang tanan dinhi sa Sugbo?
Nganong di ka man mobisita sa laing dapit nga dunay luag nga restriction sa mga biyahe taliwa ning pandemic, sama sa lungsod sa Matuguinao, Lalawigan sa Samar?
Ang lungsod sa Matuguinao gilubloban kanhi sa mga rebeldeng New People’s Army (NPA) sulod sa daghang katuigan. Apan tungod sa subsob nga mga operasyon sa armadong kusog, kapulisan ug sa local government unit, namahawa ang mga rebeldeng komunista.
Sa 2020, hingpit na kining nalibre gikan sa mga NPA.
Ang ilang mga kauban nga tagi lungsod maoy gipaninguha sa lokal nga kagamhanan nga matabangan nga makabalik sa sabakan sa balaud pinaagi sa paghatag kanila og panginabuhian aron di na sila mobalik sa walhong kalihukan.
Maabot lang kaniadto ang lungsod pinaagi sa pagsakay og sakyanan sa dagat nga mobiyahe sulod sa unom ka mga oras.
Apan niadtong 2017, gihimo ang usa ka karsada pinaagi sa pundo gikan Office of the Presidential Adviser on the Peace Process sa 2017, mabiyahe na sulod lang sa 45 minutos ang lungsod gikan sa Gandara, Samar.
TUGNAW
Ang Matuguinao, gikan sa pulong nga matugnaw, dunay busay ug cold springs. Usa na niini mao ang Matugnao Cold Spring nga duol ra sa kinapusoran sa lungsod.
Usa kini sa duha sa cold springs nga gigastuhan og P5 milyunes sa administrasyon ni Mayor Aran Boller. Ang lain mao ang Maslog Cold Spring.
Matod ni Alexis Ogacho, municipal tourism officer, nga duha pa lang una ka spring ang gipalambo sa lokal nga kagamhanan.
Si Ogacho, sa interbyu sa Superbalita Cebu, niingon nga ang LGU naninguha sa pagdani og mga turista hinungdan nga gipalambo ang mga dapit nga mamahimong tourist destinations sama sa nahisgutang mga cold spring.
Matod ni Ogacho, sa Matugnao Spring, dunay environmental fee nga P25 matag tawo. Abang nga P200 sa matag cottage nga dunay lamesa nga dunay payong ug upat ka lingkuranan.
Sa Maslog Cold Spring nga naa lang daplin sa highway, P1500 ang abang sa lima ka lamesa ug 20 ka lingkuranan. Duna say tag P200 nga usa ka lamesa ug upat ka lingkuranan. Dunay environmental fee nga P30 matag tawo.
Daghan sila og mga langob, sama sa Cathedral Cave, nga grabe ka dako nga giingong mahimong magduwa og soccer sa sulod.
Laing langob nga maoy giisip nga labing taas sa Piliipinas mao ang Sulpan Cave nga ang baba naa sa Barangay Barruz, Matuguinao, apan ang tumoy naa sa Barangay Bay-ang, lungsod sa San Jorge.
Ang Sulpan underground river system mao ang tinubdan sa tubig sa matahom nga Pinipisakan Falls.
PAGBIYAHE
Kon gikan ka sa Cebu City, sakay og barko nga biyahe padulong sa Calbayog City. Gikan sa Calbayog, sakay og van for hire padulong sa Catbalogan City. Gikan sa Catbalogan, sakay og van padung sa lungsod sa Gandara, diin mahiimo kang mosakay og habalhabal nga ang plete P100 matag tawo.
Matod ni Ogacho nga sa pag-abot sa Matuguinao, bisitahi ang ilang tourism office alang sa paggiya kanimo sa pagsuroy sa ilang mga tour destination.
Kon ganahan ka og professional guide sa trekking, ma contact si Jone Abesamis Bonifacio nga nagbase sa Catbalogan City sa iyang Facebook page. Siya eksperto sa pag guide sa pagsulod sa langob gamit ang mga ekipo. / Mga tinubdan sa hulagway: Rachel Ann Villegas, Jone Abesamis Bonifacio, Matuguinao Police Station, Rommel Rutor, I LOVE SAMAR