MGA biker nga mag grupo sa pagpanggawas ug joggers nga walay mask isyuhan og citation ticket sa Cebu City Police Office (CCTO).
Sugod sa Septiyembre 10, 2021, adunay mga sakop sa Traffic Enforcement Unit sa CCPO mosuroy sa kadalanan aron mangita sa bikers nga nag grupo sa pagbisikleta.
Kini human nakadawat og report ang CCPO nga kasagaran sa bikers wala mosunod sa lagda nga gipagawas sa Kagamhanan sa Siyudad sa Sugbo sa dihang gitugotan na ang leisure biking ug jogging.
Tungod niini, matod ni Police Lieutenant Colonel Wilbert Parilla, deputy city director for operations sa CCPO, nga kon adunay masakpan nga grupo sa bikers ug wa pa mosul-ob og facemask, lakip na ang joggers, paisyuhan silag citation ticket.
“Og naay mag grupo dapat at least duha lang ka buok mag kuyog. And then nakasul-ob og facemask. Unya the same gihapon adto sa area sad sa kanang hunonganan sa mga kan-anan, physical distancing gihapon, tanang violators ugma atong pa isyuhan og citation ticket. Mas maayo man gud ning citation kay dili na sila kinahanglan dalhon sa Ramos, isyuhan lang silag citation unya kon dili sila mobayad within the time nga gihatag sa ilaha, filan silag criminal case,” matod ni Parilla.
Samtang mosusi usab ang kapulisan sa siyudad sa mga establisemento kon natuman ba niini ang executive order nga giluwatan ni Bise Mayor Michael Rama nga mamahimo na nga maka serve ang mga kan-anan sa ilang customer nga vaccinated na.
Gipasabot ni Parilla nga ang kapulisan gihatagan og katungod nga mohimog inspeksyon sa mga establisemento sama sa kan-anan.
Kon adunay maatlan nga nangaon sa sulod nga walay vaccination card, mamahimong manubag ang management niini.
“if in case nga naay usa or duha nga walay vaccine card, atong i charge na sa establishment,” sigun ni Parilla.
Gidugang ni Parilla nga ang kagamhanan sa Siyudad sa Sugbo miawhag karon sa mga Sugboanon nga magpabakuna na aron makab-ot ang target nga gidaghanon sa mga tawo alang sa herd immunity.
Nabantayan nga gamay nalang ang magpabakuna sa mga vaccination center bisan sa kadaghan pa sa bakuna nga naa sa Department of Health (DOH) 7.
“So, ato ning gi-promote aron ang atong katawhan magpa-vaccine gyud sila,” dugang ni Parilla.