Editoryal: Paspasi ang speed limit

Editoryal Art by john Gilbert Manantan
Editoryal Art by john Gilbert Manantan

MAGHILAK ang semana kon way disgrasya nga mahitabo sa Cebu South Coastal Road (CSCR) nga milagbas sa Cebu City ug City of Talisay agi sa South Road Properties (SRP). Daghan nang mga kinabuhi nga nangakalas.

Kasagaran sa mga aksidente mao ang pagpatuyang sa pagpadagan ug nakaangin og mga kinabuhi. Naandan sa mga drayber dinhi sa Pilipinas nga kon hawan ug dako ang dan, kusog kaayong mopadagan.

Apan ning nakalabay nga mga adlaw, nagnotisya na ang Cebu City Transportation Office (CCTO) nga duna na silay random nga speed limit implementation sa CSCR pinaagi sa usa pa lang ka speed gun. Ila kining gigamit sa pagpatuman sa ordinansa sa Siyudad nga naglatid sa speed limit sa mga sakyanan sa kadalanan sa Siyudad.

Duna na silay gisita nga mga drayber nga nasakpan nilang misaylo ang speed sa 60 kilometros matag takna nga maoy speed limit. Nangakugang ang mga drayber kay sulod sa daghang katuigan, way limit ang kakusgon sa ilang pagpadagan.

Dako kini og matabang nga malikayan ang mga aksidente sa coastal road ang pagpatuman sa speed limit sa mga sakyanan. Wa na may mga drayber nga magpataka sa pagpadagan nga kusog nga ang uban mokatkat na gani ang sakyanan sa mga island nga nagsilbeng nag-uwang sa mga lane.

Dunay uban nga pasanginlan dayon nga mipalyar ang brake bisan kon ang tinuod nga rason mao ang kakusog sa pagpadagan nga niresulta sa pagpalyar sa brake system.

Hinaut pa nga ang pagpatuman sa speed limit di lang sa CSCR, kon di sa tanang mga karsada sa Dakbayan sa Sugbo aron mabadlong ang mapasagaron nga mga drayber sa kadalanan, labina sa mga nagmotorsiklo.

Namatud-an na sa mga pagtuon nga ang mga nasod nga seryusong nagpatuman sa speed limit nakapaminos sa mga road accident, labina sa mga kamatayon. Maayo unta kon dalion kini sa Siyudad pagpatuman.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph