USA ka buwan pa sa dili pa ang filing sa certificate of candidacy sa magpapili sa 2022 national ug local elections. Apan karon pa lang, mibukal na ang kawa sa pulitika. Aw, hinuon, mas maayo nang sayo kay aron makadesider ug makapili usab dayon ang mga botante kon kinsa ang angay ibutang sa puwesto. Dinhi sa ato, miitsa na sa iyang kawo si Cebu City Vice Mayor Mike Rama nga interesado nga molansar og balik sa pagka-mayor. Wala pa hinuon gibutyag ni Mike ang iyang lineup kay morag wa pa maplantsa ang grupo. Ambot kon modayon ba si Metro Cebu Water District (MCWD) chairman Joey Daluz III.
Sa habig sa Bando Osmena Pundok Kauswagan (BOPK), wala pa mobutyag kon si kinsa ang modagan, si kanhi mayor Tomas Osmena ba o si south district Congressman Bebot Abellanosa. Tak-um pa ang taga BOPK apan nagduda ko nga plantsado na ang ilang lineup. Pero mora man sab og mipakita og interes si Konsehal Dave Tumulak nga last termer. Mipagawas sab siya sa iyang Facebook account isip alternative. Puwede man gani mag-congressman si Dave sa south district kay topnotcher siya sa nangaging mga eleksiyon. Funding ra ang problema ni Dave.
‘Battle Royal’
Ang “battle royal” mao ang eleksiyon sa Dakbayan sa Carcar. Kay matod sa akong tinubdan nga modagan pagbalik sa pagkamayor si kanhi mayor Patrick Barcenas batok sa mga Apura. Ang tinubdan nagkanayon nga desidido na si Barcenas nga makigsakbang sa mga Apura. Posible nga si Nice Apura ang modagan sa pagkamayor. Sa pagkakaron, ang Carcar morag “conjugal property” na kay si Mercy, ang asawa, mayor samtang bise si Nice. Migamot na sila sa dakbayan sulod sa usa ka dekada. Angayan na ba nga hulipan?
Miporma na si Barcenas sa iyang lineup karon lang bag-o. Adunay incumbent nga mga konsehal ang dapig ni Barcenas. Dugay na usab nga nahimong mayor si Barcenas. Maayo usab ang iyang nahimo sulod sa iyang pamanuan. Daghan matod pa ang nahisagmuyo sa mga proyekto ni Apura nga walay consultation sa katawhan. Ambot kon mahusay ba kaha ning Mayor Samsam Gullas kay puro man sila sakop sa Alayon party. Mao ni angay nga atangan sa mga Carcaranon. (bobbygnalzaro@gmail.com)