PABOR si Cebu City Vice Mayor Michael Rama, nga nideklarar na nga modagan sa pagkamayor sa 2022, sa pagpatuman sa “bakuna bubble” sa syudad sa Sugbo. Usa kini sa mga paagi sa pagbukas sa ekonomiya kay ubos niini makasud na ang mga tawo sa mga commercial establishments.
Ubos sa usa ka “bakuna bubble,” ang mga malls makapasud sa mga customer nga nabakunahan ug wa mabakunahi. Ang mga restaurants, salons ug gyms nga anaa sa mga malls mopasud sa mga nabakunahan nga makapakita og vaccination card ug sa wa mabakunahi nga makapakita og negative swab test results.
Gisugyot kini ni Presidential Adviser for Entrepreneurship Joey Concepcion alang sa mga lugar sa Metro Manila ug sa ubang mga dapit nga daghan na ang nabakunahan aron libre na ang paglihok sa katawhan ug pagsulod sa mga commercial establishment.
Ang Commission on Human Rights (CHR) namahayag nga ang pagpatuman sa bakuna bubble hayan moresulta sa diskriminasyon sa mga tawo nga wa pa mabakunahi, labi na nga mas daghan ang wa pa mabakunahi kay sa nabakunahan na.
Apan si Rama nipahinumdom sa CHR sa katungdanan sa mga local chief executive sa paghatag og proteksiyon sa ilang mga constituent sa tanang higayon, sa panahon sa kalisod, katalagman, suliran sa panglawas ug sa pandemya.
Kon mao, angay nga tan-awon kon sakto ba ang proteksiyon sa bakuna bubble ngadto sa katawhan sa syudad, labi na nga ania na dinhi ang Delta variant sa Covid-19. Di ba kaha mahanaw daw buwa ang proteksiyon sa bakuna bubble?
PLUNDEMIC. Kining maong pulong gimugna sa nga netizens nunot sa gikatahong massive corruption o grabeng pangurakot taliwa sa Covid-19 pandemic. Gikombinar ang mga pulong sa Iningles nga plunder ug pandemic. Ang resulta mao ang plundemic.
Si Senador Panfilo Lacson niingon nga ang maong pulong nagpahayag ug pagpahungaw sa kalagot ug kapikal sa katawhan sa mga overpriced nga face masks, face shields, personal protective equipment (PPE) ug mga ambulansiya nga gipalit sa gobyerno.
Ang krimen nga plunder mahimo sa usa ka opisyal sa gobyerno nga makaangkon og ill-gotten wealth nga labing menos P50 milyones pinaagi sa kutay sa nga buhat nga illegal, lakip na sa graft and corruption. Unsa pa kaha kon binilyon ka pesos na?