SIGURO na ba gayud nga dili na magpapili pag-usab si Mayor Edgardo Labella? Wala pa man kita makadungog sa mayor nga miingon dili na siya magpapili pag-usab. Ang pangagpas lang nga dili na siya molansar sa umaabot nga eleksiyon kay kanunay siyang mo-leave tungod sa iyang sakit. Ang piniliay unya pa sa Mayo 9, 2021. Tingali og mobalik na ang maayong panglawas ni Mayor Labella.
Kon magpapili pag-usab ang mayor, mabungkag ang administration party kay mipahibawo na man si Bise Mayor Mike Rama nga modagan siya pagka-mayor. Gani, sumala pa, anaa na man siyay lineup sa mga modagan pagka-konsehal. Nakadungog hinuon siya sa giplanuhang Joey Daluz-Raymond Garcia tandem.
Kon mahitabo nga modagan si Mayor Labella, gipaabot nga si Garcia maoy iyang ma-bise nga suportado ni Presidential Assistant for the Visayas Secretary Mike Dino. Ang tandem ang mudala sa kampanya sa Bong Go-Rodrigo Duterte tandem kon mahinayon kini paglansar. Apan kon si Davao City Mayor Inday Sara Duterte Carpio maoy molansar pagka-presidente, tingali og si Daluz maoy palansaron pagka-mayor. Ambot og kinsay suportahan ni Sec. Dino kay dili man siya makahimo sa pag-apil sa grupo ni Inday Sara. Ang BO-PK wa pa mopahibawo kon si kinsa ang ilang mga kandidato, si Kong. Bebot Abellanosa ba o si Konsehal Franklyn Ong.
Kon mao kini mahitabo, siguro na ang kadaugan sa BO-PK. Wa gani siguro kon si Tomas Osmena ba ang modagan sa pagka-mayor. Sa ato pa, magkahiusa ang administration party sa Cebu City kon dili molansar si Mayor Labella niining umaabot nga piniliay.
Karon nga general community quarantine (GCQ) ang mga dakbayan sa Sugbo ug Mandaue, mahimo na ang leisure biking. Sa Cebu City, ang gitugot mao ang “buddy system” lang og dili mahimo ang grupo. Apan mas gi-istrikto sa Mandaue City ang pagtugot sa leisure biking. Bisan kon wala ipahibawo sa dakbayan nga kinahanglan “buddy system” lang, apan kinahanglan sila musobay sa bicycle lane, magsul-ob og reflectorized nga sinina, may suga ug dunay reflectorized ang bisikleta. Mihulga usab ang kapulisan nga kon ugaling adunay mga magpabadlong nga siklista, ilang irekomendar ang pagdili na kanila sa pagamit sa kadalanan.
Kinahanglan nga disiplinahon kining ubang mga siklista nga dili musobay sa bike lane apan magpatunga na hinuon sa dalan nga maoy kadaghanang maka-ingon sa away ingon man disgrasya.
Daghang anggulo ang gisubay sa kapulisan ug National Bureau of Investigation (NBI) sa pagpatay kang manlalaban Rex Fernandez. Dunay gikonsiderar nga persons of interest nga insider ingon man ang upat ka mga opisyal sa Bamboo Bay condominium apil na usab ang drayber nga nasamdan usab sa maong ambush. Nagtuo ako nga gisundan usab nila ang mga kaso nga gihuptan sa biktima. Ang biktima human rights lawyer nga makabangga sa pipila ka kaso ang mga tinugyanan sa balaud. (mannyrabacal1144@gmail.com)