NAMATAY ang usa ka 32-anyos nga babaye human mabangga ang iyang gimanehong motorsiklo sa usa ka van pasado alas 11 sa gabii sa Miyerkules, Septiyembre 8, 2021.
Nahitabo kini sa utlanan sa Mandaue Mactan Bridge, habig sa dakbayan sa Mandaue.
Ang namatay giilang si Cybil Degollacion, lumolupyo sa Dakbayan sa Lapu-Lapu samtang ang drayber sa van nga gikabangga niini gimaneho ni Salochano Sumalinog, taga Pilar, mga isla sa Camotes.
Matod ni Police Lieutenant Colonel Franco Oriol, hepe sa Mandaue City Police Office Traffic Enforcement Unit, nga base sa ilang imbestigasyon, giingong padung sa Lapu-Lapu si Degollacion luwan sa iyang motorsiklo samtang padung sa Mandaue usab si Sumalinog.
Parehong kusog ang dagan sa duha ka mga sakyanan, apan giingong nikawat sa pikas lane si Degollacion diin nagsubay si Degolacion sa wala matinong rason hinungdan sa ilang panagbangga.
Dali untang gidala sa tambalanan si Degollacion human makaangkon og angol sa kalawasan, apan namatay sa tambalanan.
“Pareho silang kusog kay guba man sad kaayo ang van. Among duda basin dunay gi-overtekan ang motor (gimaneho ni Degollacion) nga laing motor maong naabot sa lane sa van nga gikasugat,” pasabot ni Oriol. (GCM)