ANGAY nga manubag si Department of Health (DOH) Sec. Francisco Duque isip labing taas nga opisyal sa departamento. Kon dunay nangawkaw sa iyang mga sakop nga wala siya makabadlong, dili kay modepensa ug manghunaw sa nakaplagan sa Commission on Audit (COA) nga dili maayong paggasto sa P67 bilyunes para Covid response.
Minilyon ang gasto sa allowances ug gift certificates sa frontline workers nga walay gisuporta nga mga papeles. Gibalhin sa DOH ang P42 bilyunes ngadto sa Procurement Service sa Department of Budget and Management (PS-DBM) nga gipaburot ang presyo sa face masks, face shields, personal protective equipments, test kits, uban pa.
Gipaatubang sa senado ang kanhi PS-DBM head Lloyd Christopher Lao apan midepensa sa P8 bilyunes nga kontrata sa medical supplies tali sa Pharmally Pharmaceutical. Si Lao taga Davao ug usa sa election lawyer ni Presidente Rodrigo Duterte maoy unang gitudlo nga undersecretary sa Presidential Management Staff (PMS), defunct nga Land Used and Regulatory Board ug DBM. Kaubang election lawyer ni Lao nga nalambigit sa eskandalo sila Usec. Anderson Lao sa PMS nga itudlong Deputy Ombudsman ug Warren Rex Liong nga kanhi nadestino sa DBM nga mao na karon ang Overall Deputy Ombudsman.
Sa inbestigasyon si Sen. Richard Gordon, mipakita sa napatik nga tigom ni Duterte uban sa kadagkoan sa Pharmally nga gitambongan sa nakontrobersyal nga adviser nga si Michael Yang. Si Sen. Riza Hontiveros nanawagan sa DBM nga hunongon na ang pagdawat sa proposal sa Pharmally kay kauban sa Taiwanese company nga nalambigit og financial fraud.
Si Sen. Franklin Drilon nakonbinser nga dili lang si Lao ang nagpagawas sa P42 bilyunes gikan sa DOH ngadto sa PS-DBM kondili planado ug sinabotan nga pangawkaw aron pagtabon sa anomalosong transaksyon. Si Sen. Imee Marcos gustong ipabungkag ang PS-DBM ug Phil. International Trading kay duna namay National Procurement aron ang pundo sa ilang kustodiya nga P27 bilyunes magamit alang sa health workers, ambulance drivers, janitors ug disinfection teams.
Si Sen. Panfilo Lacson moladlad sa gipaburot nga presyo sa gipalit nga mga Nissan ambulance. Subay niini, gibanatan ni Duterte ang mga nag-imbestigar nga Senador agig pagdupa sa mga tinudlo timaan sa iyang pagsalig ilabina ni Gordon nga gihimong gatasan sa pangwarta ang gipangulohang Phliippine Red Cross aron gamiton sa eleksyon sa 2022. Mikisikisi sa pagpanghimakak si Gordon nga maoy chairman sa Senate Blue Ribbon Committee. (csa_1156@yahoo.com / 09064648954)