DI na kapugngan ang pagbukas sa klase sa mga publikong tunghaan (Septiyembre 13). Matod sa usa ka programa kaniadto sa telebisyon, “Handa ka na ba?” Base sa kasinatian sa miaging tuig, ambot og andam na ba ang tanan. Sa wala pay pandemiya, ang mga tunun-an unta ang mahasol sa ilang pagtungha kung leksiyon ang hisgutan.
Karon, hastang mga ginikanan moapil na sa salida pagsagubang sa mga module sa ilang mga anak. Mga inahan, di ba tinuod nga apektado ang imong inadlawng panginabuhian tungod aning module? Samot na sa mga inahan nga daghan og gipaeskwela. Ang mga module nga naghisgot og projects? Mga photocopy nga kinahanglan nga colored ang i-submit? Maayo ra ba og sensilyo lang ang ibayad.
Mao nga manawagan ta sa Department of Education (DepEd) apil na ang barangay, pangitai daw ninyo og paagi nga maka pa-photo copy ni sila og libre. Sa kalisod sa panginabuhi karon, makapalit na og bugas kanang ilang ibayad. Dia pay lain. Tungod kay sirado ang mga library, ang internet dako kaayo og papel aron ang mga tinun-an makahimo sa ilang gusto nga i-research. Mao ni ang komon kaayo nga problema, kay ang mga tubag sa module kinahanglan pa nga idangop sa internet.
Kung way ikapalit og load, mag-unsa naman lang? Mao bitaw nga makalipay kaayo basahon ang mga post sa social media nga dunay mga kahugpongan nga nitampo og computers apil na ang internet connection alang sa mga tinun-an. Ambot og naa ba ni dinhi sa ato? Palihug i-update daw ko.
Libre nga photo copy ug internet connection para sa mga estudyante gikinahanglan kaayo aron maabagan sa galastuhan ang mga bata. Basin ang ubang kahugpongan diha nga nagplano nga motabang sa atong mga tinun-an, iapil daw ninyo og hisgut kining akong gituki nga problema.
Mao bitaw nga sa nakalabay nato nha duha ka Asoy, giduso nako ang pagtunol og ayudang pinansiyal alang sa tinun-an taliwala sa pandemya aron makasapar sa mga gastuhanan ning pagbukas sa klase. Wa pa man gyud ta kadungog og positibong aksiyon. Sama ba sa social amelioration program (SAP) kaniadto nga hilabihan ka kontrobersiyal, unta matagad kini aron malipay sab tawon ning mga estudyante.
Pero kung ingnon ta nga way ikahatag kay way pundo ang gobiyerno, pasabta ninyo ang mga bata. Kada diskurso ninyo sa entablado, siging balik balik anang estorya nga ang atong kabataan maoy paglaum sa nasod. Unya hikawan sa ayuda? Balik ta sa pagbukas sa klase karong adlawa. Kay wa pa may face to face, online ug module maoy atong atubangon.
Sa mga niundang sa miaging tuig, mga panghinaot nga mobalik namo pag-eskwela kay anugon kaayo ang tuig. Unya kadtong naka eskwela na, unta mopadayon mo sa pagtungha. Kong maghulat pa ta kong kanus-a ma-normal ning abnormal kaayo nato nga kahimtang karon, wa pay nasayod.