SEGURO, ang Dakbayan sa Sugbo maoy unang local government unit (LGU) sa nasod nga magtanyag og telemedicine pinaagi sa Cebu City Medical Center (CCMC) ug Cebu City Health Department (CHD) human gipasar sa konseho ang ordinansa nga gipanday ug giduso ni Konsehal Alvin Dizon nga nag-ulohan og “Telemedicine Services Ordinance in the City of Cebu.” Si Dizon niduso sa P5 milyunes nga budyet matag tuig alang sa operasyon sa telemedicine.
Gipaneguro sa ordinansa nga kinahanglang moagi pa og training ug capacity building ang healthcare providers sa CCMC ug CHD pinaagi sa pagpakigdugtong sa mga batid sa binag-o nga pamaagi sa medisina sama sa Department of Health (DOH)-University of the Philippines-Manila joint memorandum circular nga Telemedicine Practice Guidelines nga gipagawas niadtong Hunyo 8, 2020 ug ang Telemedicine Guidance for Physicians in the Philippines sa Philippine Medical Association (PMA).
Sumala sa ordinansa, maglusad og education campaign para makahibalo ang publiko sa benepisyo sa telemedicine --mga serbisyo ug pagpanambal ug uban pang impormasyon pag-awhag sa mga pasyente nga mogamit sa digital platform sa pag-access sa naasoy nga serbisyo.
Tukma sa panahon sa pandemiya. Nag-una na usab ang dakbayan sa labing ulahing pamaagi sa serbisyong medikal. Hunuon, dugay na kining gipaila sa health care providers ug dugang tanyag sa telephone companies nga digitalization sama sa Globe apan wala dayon gisagop. Dihang nibuto ang krisis sa Covid-19 sa kalibotan, mipaspas ug obligado sa digitalization, naapil niini ang telemedicine, ang pagpatambal nga remote, pinaagi landline ug mobile phone.
Halandumon ang pagpasar sa ordinansa sa telemedicine sa Dakbayan sa Sugbo human natunong sa adlaw ni Birhen Maria o Mama Mary sa Septiyembre 8. Alang sa mga magtutuo, ang Birhen naila sa daghang milagro sa pag-ayo sa masakiton.
Dalaygon. Grasya ang telemedicine alang sa mga kabus.