DILI direktang moigo ang bagyong “Kiko” sa Sugbo ug sa pagkakaron, tua kini naghulga sa amihanang Luzon.
Apan, ang Philippine Atmospheric Geophysical and Astronomical Services Administration (Pagasa) Mactan nipasidaan ang mokusog ang hanging habagat nga nagdala og pag-uwan tungod ni Kiko.
Si Kiko nisud sa Philippine Area of Responsibility (PAR) niadtong Septiyembre 7, usa ka adlaw sa wala pa hingpit mobiya sa nasod ang unang bagyong Jolina niadtong Septiyembre 8.
Gibanabana nga ang Sugbo gipaabot nga makasinati og mapanganuron, hangin, ug pag-uwan gikan sa hinay ngadto sa pagkakusog.
Si Pagasa weather specialist Jhomer Eclarino nagkanayaon nga ang pat-akpat-ak nga uwan kagahapon sa hapon, Septiyembre 10, tungod sa habagat nga napakusog tungod ni Kiko.
“Hangin is moderate and the wave height is moderate, kasarangan. So, delikado ang gagmay kaayo na sasakyan pandagat labi na wala pa na ka landfall ang bagyong Kiko,” matod ni Eclarino, walay gale warning nga giisyu alang sa Sugbo kagahapon.
Ang Sugbo gibanaba nga makasinati sa gikusgon sa hangin nga moabot og 30 ngadto sa 40 kilometros matag oras ug ang gitas-on sa balod moabot og 1.25 ngadto sa 2.4 meters.
Matod ni Eclarino, ang Pagasa Mactan Station nakatala og 27.5 millimeters (mm) sa uwan atol sa pagkusokuso bagyong Jolina dinhi sa Kabisay-an.
Ang matag 1 mm nga uwan katugbang sa 5,000 ka baril sa uwan per square kilometer, dason ni Eclarino. (WBS)