USA ka single parent nga dunay pito ka anak ang napilian nga tagaan og house and lot ubos sa programa nga “Bahay mo, Puso ko” sa City Mobile Force Company (CMFC).
Si Jenesa Belenia, 46, single parent, maoy palaran nga na pilian nga mahatagan og bag-ong balay sa CMFC nga kabahin sa barangayanihan program sa kapulisan.
Gihimo ang groundbreaking ceremony sa tukoran sa balay nga gipangulohan ni Police Major Chuck Barandog uban ni Yvonne Cania, hepe sa Cebu City Medical Center (CCMC), ug mga sakop sa STL Foundation nga usa sa miabag sa maong proyekto.
Ang maong balay nga sugdan pagtukod sa Lunes, Septiyembre 13, sa Sitio Tiguib, Barangay Malubog nga bukirang dapit sa siyudad sa Sugbo.
Matod ni Police Major Chuck Barandog, hepe sa CMFC, nga nakahan-ay na ang tanan kung kinsa ang mahimong mahatagan sanglit gi-validate na kini sa Department of Social Welfare and Services (DSWS) sa dakbayan sa Sugbo diin kadtong labing kabus ang makabenepisyo sa maong proyekto.
“Naa tay category nga gisunod naa tay criteria nga gisunod ani, unang una katong mga less fortunate sa barangay nga gi validate sa DSWS then gipa validate pud sa social welfare sa baranga,” matod ni Barandog.
Gitug-an ni Barandog nga human sa unang groundbreaking nga gihimo sa Barangay Pamutan, usa ka semana na ang nakalabay daghang barangay officials ang nanawag kaniya nga hatagan usab ang ilang residente og balay.
Apan mipasabot kini nga dili ingon ana ka sayon ang pagpili sa mga kabus nga pamilya sanglit ipaagi kini sa saktong ahensya nga maoy gitahasan nga mosusi kung unsa ka tinuod nga ang maong pamilya tinuod nga labing kabus.
Si Belenia nagpasalamat nga siya ang gipili nga makaangkon og balay sanglit nagpuyo lang sila og barong-barong sa bukid nga igo lang masulod ang pito niya ka anak ug usa ka apo.
Iyang gibiyaan ang iyang bana tungod kay kusog kining manapat kaniya ilabi na kung mahubog.
“Dako gyud ning grasya nga gihatag sa Ginoo nako ug sa CMFC labi na karon nga pandemic nakatabang ni nako,” matod ni Jenesa Belenia.
Gisaad sa EEI Corp. nga maoy motukod sa balay nga sulod lang sa 26 ka adlaw mahuman na nila kini inabagan sa mga residente sa malubog nga maoy i-hire sa pag trabaho niini.
Matod ni Carl Benzon Ybasan, ilang nganlan og Project Mob ang pagtukod sa maong balay sanglit ipahinungod nila kini sa ilang project director nga mao unta ang mo-supervise niini apan namatay ning bag-o tungod sa coronavirus disease 2019 (Covid-19). (AYB)