Bisan kinsa makaligo na sa Alcoy

Gilibkas na sa lokal nga kagamhanan sa lungsod sa Alcoy, habagatang Sugbo sugod sa alas 6 sa buntag sa Sabado, Septiyembre 11, 2021, ang pagdili sa mga di lumolupyo sa lungsod sa pagkaligo sa ilang mga baybayon.

Si Mayor Michael Angelo Sestoso, sa iyang Executive Order No. 2021-037 nga giluwatan sa Septiyembre 10, 2021, nilibkas sa iyang unang kamandoan sa pagdili sa pagkaligo sa mga dili Alcoyanon sa ilang mga baybayon.

“Non-Alcoyanon shall now be allowed bathing in all beaches within the territorial jurisdiction of the Municipality of Alcoy,” nagkanayon ang EO ni Sestoso.

Apan kinahanglan nga naa lang sa 50 porsyento sa iyang kapasidad ang gitugot nga makakaligo ug gidili usab ang pagdala og pagkaon ug ilimnon sa beach fronts.

Kinahanglan usab nga tumanon ang mga health protocol sama sa pagsul-ob kanunay og facemasks.

Giawhag ni Sestoso ang mga nanag-iya ug nag operate og resorts sa pagtuman kanunay sa mga rekisitos nga gitakda sa Department of Tourism (DOT) ug Cebu Provincial Tourism Office ingon man makigtambayayong sa local tourism office ug Local Disaster Risk Reduction and Management Office (LDRRMO).

Niadtong Agusto 19, 2021, si Sestoso niluwat og executive order nga nagdili sa mga di Alcoyanon sa pagkaligo sa ilang mga beach taliwa sa nagsakang mga kaso sa coronavirus disease 2019 (Covid-19). (REV)