SUPERBALITA CEBU

Vallena: Tungod sa road rage

Pedal

Duha ka mga road rage sa mga karsada sa Dakbayan sa Mandaue sa managlahi nga mga petsa nagbutang sa kauwaw sa biking community. Ang una, duha ka bikers nanukmag ug nanapog og usa ka delivery driver. Sa ikaduha, gihagad og sukmagay ang usa ka driver sa multicab kay gibusinahan ang mga biker nga nakaali sa trapiko.

Nagpakauwaw tungod kay pila ra ni sila ka buok nga mga biker nga ingon ana og taras. Sa kadaghan sa akong mga amigo nga dugay na sa biseklita, wa ko makasugat anang batasan nga maorag maoy hari sa karsada.

Duha ka grupo ang akong mga higala, mga rich ug pareho nga yano ra. Rich means ang biseklita at least P300,000 ang usa. Yano nagpasabot nga naa sa P40,000 ngadto sa P70,000 ang biseklita. But wa ko makadungog nga nanghambog ang akong mga higala.

Nganong manghambog ka pa man nga ang mga biker nakahibawo man na kon ang imong frame ug parts mahal ba o average lang og kantidad. Gawas sa biking community, way paki ang mga tawo kon mahal o barato ang imong biseklita. Ilang nakita biseklita ra.

Tungod sa ilang gibuhat, tan-aw sa tanang mga tawo nga nagbiseklita mga hambogero, way batasan ug hawod sa karsada. Ang buhat sa pipila naratsada ang tanan.

SINGLE FILE

Dihang akong gianad ang mga bata og biseklita sa karsada, akong gitudlo nila ang paglinya sa daplin, di magtupad, magsunod lang. Kon mag-estorya dak-on lang ang tingog aron magdungog.

Nahinumdom pa ko nga high school pa ang akong mga anak, manikad mi sa downtown ngadto sa uptown sa Cebu City. But wa nako tugti nga magtupad sila sa pagpadagan sa biseklita. Maglinya lang nga single file aron makaagi ang ubang mga sakyanan.

Apan bisan pa kaniadto, makakita ko og mga biker nga magtupad mag-estorya sa karsada samtang nagsikad. Sagad ani nila “rich kids” apan way batasan sa karsada. Hambog sab kaayo ni sila sa ilang mga biseklita ug di magpalupig sa pagsaka bisan kakuyapon na sa kakapoy.

Think of it, ang karsada alang sa tanan, datu ug pobre. Gitukod ni aron pagpalihok nga paspas sa mga tawo. Busa, kon naa ka sa karsada, tahod kanunay sa ubang mga motorista.

TUMAN LANG

Tungod sa mga hitabo sa road rage, ang Siyudad sa Mandaue mopatuman sa bike ordinance nga gipasar sa Siyudad. Pasubayon na sa bike lanes ang mga nagbiseklita. Kinahanglan ang biseklita dunay blinkers sa likod ug atubangan.

Kinahanglan usab nga ang magbiseklita magsul-ob og light o makita nga sapot bisan sa gabii. Di kanang dark ang isul-ob.

Kani hinuon tanan alang ra sab ni sa kaayuhan sa bikers. Apan maluoy lang ta niadtong mga kabus nga maglisod gani sa pagpalit og barato nga blinker ug nagbiseklita aron makadaginot sa gasto.

Naangin ra tawon sila sa mga tawo nga puro hangin ang sulod sa ulo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!