Negusyo sa mga Du gipaimbetigar ni Caindec sa BIR, DOF

Si Land Transportation Office (LTO) 7 Regional Director Victor Emmanuel Caindec nihangyo, pinaagi sa suwat, ngadto sa Bureau of Internal Revenue (BIR) ug Department of Finance, sa pag-imbestigar sa motorcycle business sa pamilyang Du.

Si Caindec mipadala og suwat ngadto kang BIR Commissioner Caesar Dulay aron mohangyo og imbestigasyon kabahin sa tax fraud batok sa Du Ek Sam Inc., Des Marketing Inc., Des Strong Motors Inc., Desmark Corp., ug Premio.

Sa iyang prefatory statement, matod ni Caindec nga ang korporasyon “cheating the government of billions worth of revenue through corporate scheme aimed at defrauding the State and Local Government Units of what it is rightfully due.”

Makita usab sa suwat nga gipadala ni Caindec sa BIR ang ebidensiya sa duha ka mga resibo nga managlahi ang invoice numbers, petsa, lugar sa gipalitan sa unit ug total mismo sa presyo sa maong unit.

Ang maong suwat ni Caindec gipetsahan og Septiyembre 8 ug nadawat sa buhatan sa BIR niadtong Biyernes, Septiyembre 10.

Samtang laing suwat usab ang gipadala ni Caindec kang Department of Finance Secretary Carlos Dominguez aron pag-imbestigar sa mga korporasyon kabahin sa tax evasion nga daw gibuhat sa maong mga korporasyon.

Sa ilang pamahayag sa dihang nitumaw kining kontrobersiya, ang pamilyang Du nanghimakak sa pasangil batok kang Caindec.

Ilang gipasanginlan ang opisyal nga nisuway sa pagpangilkil kanila. Apan si Caindec nanghimakak usab sa pasangil kay tarong siyang nagdumala sa LTO.

Ubos sa iyang liderato, nakapaabli siya og daghang extension nga mga buhatan aron mas sayon sa publiko pag transact sa LTO. (REV, gikan sa PR)