Mosugod na lang ang 2021-22 NBA sunod buwan apan wa gihapon mahatagi og kasulbaran kining problema karon ni Ben Simmons ug sa iyang mother team nga Philadelphia Sixers.
Sa niaging buwan, si Ben Simmons nipadangat og mensahe ngadto sa front office sa Philly nga wa na siyay gana pa nga moduwa sa team ug gusto na kining magpa trade.
Gani human sila na eliminate sa Atlanta Hawks sa Eastern conference playoffs sa niaging season, wa na mopakita si Simmons sa Sixers.
Matod pa, dili na kini interesado nga mobalik bisan pa sa praktis sa team ug andam kini nga modawat bisag pilay penalty nga i-deduct sa iyang suweldo.
In fairnes sa Sixers, taodtaod na usab kini nga nisuway pagpangita og team diin ilang ika-trade si Simmons, pero ang problema kay wa pay nikagat tungod sa trade value niini.
Kini maoy rason kon nganong hangtod karon pending gihapon ang request sa 6-11 nga Australian national kinsa maoy top pick sa 2016 NBA Draft.
Sa iyang gitas-on, ang 25-anyos nga Simmons adunay abilidad sa pag-dribble, pasa ug maayo usab nga modepensa gawas nga gamit usab siya sa rebounding department.
Kini maoy hinungdan nganong gipapirma siya og lima ka tuig nga extension sa iyang kontrata sa Sixers nga mokantidad og $177 milyones, bisan pa man og minus siya sa outside shooting.
Dili na moitsa bisan pabor kaayo, unya dihay higayon nga imbis ihansak ang bola kay anaa ra sa iyang atubangan ang ring, iya na man hinuon nga gipasa.
Iyang rason nga basin og dunay mo-foul kaniya ug mahadlok nga tingalig masipyat siya sa free throw line.
Ang statistics nagpakita nga nitiurok og maayo ang iyang performance sa kinatibuk-ang playoffs.
Sa laktod nga pagkasulti, wa siya kaabot sa expectations sa Sixers nga maoy gibasehan sa iyang suweldo.
Ang nakapakomplikado og samot sa sitwasyon mao nga ning uwahi lang, si Simmons imbis makig-ayuda o makigsabotsabot sa Sixers aron mapadali ang iyang hangyo, nipadangat pa hinuon kini og hait nga mensahe.
Kinsa may ganahan mosugal sa kadako sa kontrata ni Simmons nga wa man ni maayong gipakita sa niaging season? Imbis hangupon ang sugyot nga i-develop ang iyang shooting, daw og sa nangluod na man hinuon.
The best thing nga buhaton unta niya mao ang pagbalik sa sabakan sa Sixers ug didto iyang ibuga ang tanan niyang abilidad aron daghang team ang maagni kaniya.
Mao ni iyang himuong ticket aron siya makagawas sa Philadelphia. Otherwise, siya ra gihapon ang maalaot. jun.migallen22@gmail.com