SUPERBALITA CEBU

Diola: Nakapisos, nakasab-an

Mao diay

Binasi sa Isaias 50:5-9; Salmo 116; Santiago 2:14-18; Marcos 8:27-35

Wala ko masayod kon diin gikan ang pulong nga “nakapisos”. Ig-agaw ra kini sa nakasab-an apan dili kaayo sakit paminawon. Gani kon ang usa ka tawo makasab-an unya ipaagi na lang niyag katawa ang maong panghitabo, moingon siya, “Nakapisos ko”. Medyo gaan gaan paminawon. Basig gikan kini sa buhaton sa usa ka ginikanan nga, human makatilaw og pawo o kasaba ang iyang anak gikan kaniya, mangita siyag paagi sa pagbawi sa sakit nga iyang napadangat. Siguro kaniadto igo na nga makadawat og piso ang bata.

“Ug gidala siya ni Pedro sa daplin, ug misugod siya pagbadlong kaniya.” Nahitabo kini kay gitag-an ni Jesus ang iyang umaabot nga pag-antos ubos sa mga kamot sa kadagkoan sa mga Judio nga maoy mopatay kaniya. Nakapisos si Jesus sa iyang sumusunod nga nangandoy lamang sa iyang kaayohan, sumala sa pagsabot niini ni Pedro.

Apan nabadlongan hinuon si Pedro: “Apan human siya miliso ug mitan-aw sa iyang mga tinun-an, gibadlong niya si Pedro ug miingon, ‘Palayo kanako, Satanas. Kay naghunahuna ikaw dili sa mga butang sa Dios, kondili sa mga butang sa tawo.” Dili kini nakapisos kondili nakasab-an kay, sa paagi nga wala niya damha, ang iyang pagbadlong ni Jesus nihaom sa plano ni Satanas nga mao ang pagbalda sa plano sa Dios.

Makita nato ang maong pagbalda sa dihang gitintal sa bitin sila si Adan ug Eba ug kini sila misakay sa maong tentasyon. Nahaylo sila sa mga pulong sa bitin nga misaad og gahom nga labaw pa sa gihatag sa Ginuo kanila. Mora man god og nindot. Susama ang gihimo ni Pedro sa dihang buot niyang pugngan ang mahitabo kang Jesus nga mao ang katumanan sa plano sa pagpangluwas sa Dios. Nakasab-an si Pedro aron mahigmata siya.

Morag nakapisos ang mga tigpaminaw ni Santiago sa dihang gihagit niya sila: “Pakit-a ako sa imong pagtuo nga walay buhat ug pakit-on ko ikaw sa akong pagtuo pinaagi sa akong mga buhat.” Dili man god paigo nga moingon kitag mingtuo kita sa Dios – o “I receive Jesus as my personal Lord and Savior” – unya wala kitay buhat alang sa mga kabos. “Patay kini kon dili ubanan sa buhat.”

Mahinungdanon kaayo kining maong pahimangno ni Santiago. Kon gisunod pa lamang kini nato diri sa atong nasod, dugay na untang mikunhod ang numero sa mga kabos. Dugay na untang mihunong ang korapsyon. Dugay na untang mihunong ang pagpangguba sa atong kinaiyahan.

Matag karon ug unya, makapisos kita sa Ginuo sa dihang pahinumdman kita niya sa atong mga katungdanan isip mga magtutuo. Kon mahigmata kita ug mobuhat sa kabubut-on sa Dios, gasahan pod kita sa Ginuo aron molahutay sa angay natong buhaton. Sa pulong pa ni propeta Isaias: “Kay mitabang man kanako ang Ginuong Dios, busa wala ako maunsa; ug gitaon ko ang akong nawong ingon sa batong bantilis, ug nasayod ako nga dili gayod ako maulawan.”

Makadasig kining mga pulonga. Kini diayng makapisos – o usahay makasab-an – kita sa Ginuo, alang kini sa atong kaayohan dinhi sa atong pagpuyo sa yuta sa mga buhi, sumala pa sa salmo.

Nakapisos na ba kita sa Ginuo? Ngano man? Giunsa man nato pagdawat niini?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph