Wala ko mosulti dayon kaninyong mga pinalanggang magbabasa nga nahospital intawon ko bale og usa ka semana mga duha ka semana na ang milabay. Nisaka paggrabi kining atong sugar ug blood pressure. Ug dako kaayo ang akong pasalamat sa UCMED.
Nabalaka kaayo ko dihang kalit ko nga nalipong ug gani nagsuka mga tungatunga sa gabii. Dihang nag-online consultation, gitambagan ko nga moadto og emergency room.
Nah, nabalaka kaayo ko ug akong pamilya kay nabalita baya nga puno ang mga ER sa mga hospital sa Metro Cebu. Bisan pa man, nideretso mi sa akong anak sa usa ka dakong hospital diha sa Mandaue Reclamation. Ug tuod ila ko nga ipa-waiting kay duna pay daghan nag-una. Lima ang waiting samtang puno ang ER.
Diha-diha, nidesisyon mi nga moadto sa labing duol nga laing hospital. Ug dako akong pasalamat nga bisan og daghan sila og mga pasyente nga na-Covid-19, giateman ko diretso sa ER sa UCMED. Nindot ang ilang sistema kay gawas nga gidawat dayon sa ER, naa silay mga bakante nga katre nga giandam alang sa mga pasyenteng dili Covid-19.
Nakaestar ko sa ilang floor diin mag-atang ka sa resulta sa Covid test ug kay negative man, didto ko gidala sa usa ka non-Covid floor nga belib ko sa view sa Mactan channel.
Wa koy reklamo sa ilang professional kaayo nga staff. Ug nakahibawo na ko nga ingkaso simbako kinahanglan ko nga magpa-admit, anha gyud dayon ko sa UCMED.
Partido Barug
Nabakikaw tuod ang mga konsehal sa partidong Barug human nisang-at og kaso ang Carbon Alliance nga ibasura ang Joint Venture Agreement (JVA) tali sa Cebu City Hall ug ang Megawide Construction Corporation.
Nakita nato kini dihang nagdali-dali silang niuyon sa memorandum og agreement (MOA) ni Bise Mayor ug karon acting mayor Mike Rama. Ang maong MOA kunohay motambal sa mga problema sa JVA.
Buot ipasabot, niangkon silang nipirma og JVA nga binilyon ang kantidad apan daghan og sayop diay. Asa ka mangita og pundok sa mga konsehal nga ingon niini ka hanggaw.
Timan-i nga usa ray labaw sa mayoriya nga Barug batok sa minoriya nga BOPK. Apan mausab kini kay nag-sick leave na man sab si Mayor Edgar Labella. Buot ipasabot, mag-acting mayor si Rama ug mag-acting vice mayor si Dondon Hontiveros.
Tabla na ang kadaghanon sa mga konsehal sa Barug ug BOPK. Modaug lang sila sa botohan kon matabla ug mobotar ang presiding officer nga si Dondon.
Apan, daghan pa diay og panghitabo human niini. Nagdeklarar nga independent sila si Dondon ug Konsehal Phillip Zafra.(DM nako sa @anol_cebu)