Daghang netizens o tingali puro mga biker, nangreklamo sa hukom sa Kagamhanan sa Dakbayan sa Mandaue sa pagpatuman sa bike ordinance sa Siyudad. Nahukman kini sa Siyudad tungod sa duha ka mga insidente sa road rage nga nahitabo sa karsada sa Mandaue City.
Matod sa City Hall nga tumong sa pagpatuman sa ordinansa mao ang paglikay nga di na masubli ang road rage kay duna na may kasubayan nga bike lanes ang mga siklista.
Sa pagpatuman sa ordinansa, dunay gitakda nga kinahanglang pangbuhaton ang mga siklista, di lang kay sa pagsubay ra sa bike lane. Apil na niini ang pagbutang og blinkers sa atubangan ug likod sa biseklita. Pagsul-ob og sapot nga makita bisan sa gabii. Kinahanglan nga mag-helmet.
Kon tan-awon, kining mga lagda sayon rang tumanon sa mga leisure biker ug mga atleta kay duna man silay igong kwarta nga ikagasto. Apan ang yanong mga trabahante maka afford kaha sila bisan sa labing barato nga helmet? Mao gani nga nagbiseklita sila aron maka save og dako, labina adtong ang trabahoan nga kaduha ngadto sa katulo sakya, unya one-way. Sa ato pa, kaunom sila mosakay. Kadako sa gasto sa pletihan.
Hinaut pang sundon sa Dakbayan sa Mandaue ang gibuhat ni Cebu City Mayor Edgardo Labella nga nagtukod og bike board nga maoy gitahasan sa pagpatuman sa ordinansa ug mga polisiya sa biseklita. Nang-edukar pa usab sila sa mga siklista kabahin sa road safety, traffic laws ug bike ordinance.
Education and information ang unahon unta sa pagpatuman sa Mandaue City, inay nga manakop og diretso. Kanang mosabot ba sa sitwasyon nga di tanang nagbiseklita “rich kids.” Naay daghan intawon nga ila ning gigamit sa panginabuhi ug sila ray gisaligan sa pamilya.
Sa mga siklista, hinaut pang leksyon kini sa tanan nga ang pag isog isog sa karsada sa usa, ratsada ang tanan. Di ka makonsensya?