Si Liloan, Cebu Mayor Christina Garcia-Frasco gipasidunggan og Presidential Lingkod Bayan regional award sa Civil Service Commission sa 2021 Search for Outstanding Government Workers sa Biyernes, Septiyembre 10, 2021.
Si Garcia-Frasco giila tungod sa iyang “proactive initiatives” isip local chief executive padung sa mga kabag-ohan sa pangagamhanan ug malungtaron nga mga programa nga nag-alima sa maayong serbisyo sa kagamhanan.
Sa usa ka suwat alang kang Garcia-Frasco, si CSC 7 Director Carlos Evangelista niingon nga “your laudable endeavors and accomplishments as the Municipal Mayor is truly an inspiration and worthy of emulation.”
Ang Presidential Lingkod Bayan Award ipasidungog ngadto sa mga individual o grupo alang sa “exceptional or extraordinary contributions resulting from an idea or performance that had nationwide impact on public interest, security, and patrimony.”
Gihatag ngadto sa mayor ang award pinaagi sa usa ka virtual nga seremonyas nga gipahigayon sa CSC sa Biyernes isip tipik sa iyang Honor Awards Program nga nag-ila sa mga opisyal sa kagamhanan ug kawani nga nagpakita og outstanding nga paghimo sa trabaho.
Mga nahimo ni Garcia-Frasco naglakip sa paggamit sa smart technology-based nga mga kabag-ohan sa pangagamhanan aron pagkombate sa mga hagit sa Covid-19 pandemic, pagpatuman sa usa sa labing dako nga scholarship program, pagdasig sa pagpakita sa patriyotismo ug dapit nga ikapasigarbo pinaagi sa mga programa nga moabot sa kinaubsan alang sa pagsuporta sa local artists ug uban pa. (REV gikan sa PR)