Giuswag sa Dakbayan sa Mandaue ang ilang pagpatuman sa bike ordinance sa Siyudad.
Si Edwin Anthony Jumao-as, executive director sa Traffic Enforcement Agency of Mandaue (Team), nipahibawo sa Superbalita Cebu nga di una nila ipatuman ang ordinansa sa biseklita sa Siyudad sugod sunod semana.
Ila unang unahon ang pagpakatap sa mga impormasyon ug pag-edukar sa mga siklista.
“Information drive pa man kay daghan gyud dalan nga wala pa namo maadto,” matod ni Jumao-as sa usa ka text message.
Sa Sabado nagpahigayon sila og information drive sa karsada pinaagi sa pagpamara sa mga nagbiseklita, apan ang ilang Facebook post nga naa ang hulagway gitangtang.
Miani og daghang mga pagsaway ang hukom sa Mandaue City sa pagpatuman sa ordinansa nga gipasar sa 2020.
Sagad sa gireklamo sa mga biker mao ang pagpasul-ob og reflectorized vest nga gawas nga mahal, alimuot usab sa biker nga nabuwad nang daan sa adlaw.
“Dili diay mi pwede makasuot sa amuang jersey ani nga dili light ? Bisag naay blinkers ug headlights?,” matod sa usa ka bike enthusiast agig reaksyon sa pahibawo sa Facebook page sa Team.
Duna usay nireklamo nga mga biker kinsang matang sa biseklita mao ang fixed gear kun “sagidas” nga wa magkinahanglan og brake.
Nangreklamo ang mao nga mga biker kay ang ilang matang sa biseklita way brake ug naa sa ordinansa nga kinahanglan naay brake ang bike.
Apan njitubag ang Team nga gi-exempt nila ang fixed gear bikes.
Wa motubag si Jumao-as sa pangutana kon duna na ba silay klarong petsa kanus-a sugdan ang pagpatuman sa bike ordinance.(REV)