TUIG 2018 pa, hinay-hinay nang nagsugod ang kalihokan sa Run-Sara-Run gikan dinhi sa atong Dakbayan sa Davao ug ubang mga dapit dinhi sa Mindanao hangtud sa Visayas ug sa Luzon.
Maayo ang resulta, sa laktud nga pagkasulti gidawat sa mga mayores, gobernador ug mga kongresista sa tanang dapit sa atong nasud nga gisum-ok sa mga kapitanes dinhi sa atong siyudad nga maoy nag-organiza nga gusto pud nila nga ang anak sa atong Presidente, Rodrigo Roa Duterte, may mosunod sa iyang tunob sa pagka-presidente tungod sa kabag-ohan nga gipakita sa amahan.
Dinhi sa Davao, ato sad nga naobserbahan nga bisan sa iyang kabatan-on adunay katakos, kaisog, kapasidad, determinasyon nga kuwalipikado nang mahimong presidente sa atong nasud puli sa iyang amahan.
Gikan sa 2018 hangtud karon, plantsado na. Kamatuoran daghan ang nagboluntaryo sa Run-Sara-Run aron makuha gyud ang suporta dili lang sa mga mayores kon dili sa mga kapitanes sa pagsuporta kang Mayor Sara sa pagka-presidente sa 2022 Presidential Elections.
Apan kalit nahugno ang pipila ka dapit sa Pilipinas sa dihang natapos ang National Convention sa Partido Demokratiko Pilipino (PDP-Laban) nga ang gi-indorso ang Go-Duterte tandem, Christopher Bong Go sa pagka-presidente ug Rodrigo Duterte sa pagka-bise presidente. Ug dinhi opisyal nga mipagawas og pahayag si Mayor Sara nga dili na siya modayon sa pagdagan, tungod kay dili siya gusto nga duha ka Duterte ang modagan sa posisyon nga presidente ug bise-presidente.
May punto dinhi si Mayor Sara, kay kon dinhi lang sa ato, gusto nato nga mag-tandem ang amahan ug anak, tungod kay wala sila magkulang sa kalamboan nga atong gipahimuslan dinhi sa atong siyudad sa Davao. Pero dili puwede nga mag-tandem ang amahan ug anak sa nasyonal nga posisyon kay tawgon na sila'g hakog sa gahum ug di na gustong mohawa nga mora'g linta.
Pero motuo ba mo nga dili mahinayon si Mayor Sara modagan sa pagka-presidente? Kini estilo sa pamolitika sa mga Duterte, sus, mora biya mo'g dili taga Davao? Adunay 17 ka adlaw na lang ting-file na sa certificate of candidacy, sa dili pa moabot ang Oktubre 8, sa katapusang adlaw sa pag-file sa certificate of candidacy duna nay dakong kausaban si Sara ang kandidto sa pagk-presidente, ug segurado nga taga Luzon ang iyang ka-tandem sa pagka-bise presidente ug dili ang iyang amahan.
Kini ato lang gibase sa ilang estilo sa pamolitika dinhi sa ato? Apan kon ila gyung dalhon sa nasyonal? Aw, wa na tay mahimo diha, kay kon dili na gyud modagan si Mayor Sara, wala say motuo nga mag-tandem ang Go-Duterte nga pulos taga Davao. Puwerteng pildiha nila, pero mas bright pa na sila sa politika kay sa ato di ba? Relax lang? Sara lagi na.