TINGKAGOL na sa prisohan sa kapulisan ang usa ka ama-ama human madakpi tungod suspek kini sa paglugos sa iyang 11-anyos nga step-daughter alas 10 sa buntag, Sabado, Septiyembre 11, 2021.
Giila ang suspek nga si Eddie Garcia Alvarez, 29, mag-uuma, ug nagpuyo sa Barangay Pilar, South Upi, Maguindanao Province.
Gibutyag ni Maguindanao Provincial Police Office Director Colonel Jibin Bongcayao nga nakadawat og taho ang South Upi Municipal Police Station gikan sa buhatan sa Violence Against Women (VAW) sa kaso nga pagpanglugos sa ama-ama ngadto sa 11-anyos niyang dalagita.
Gisusi dayon sa South Upi Municipal Police Station ang hitabo ug positibo nga gilugos ang biktima.
Milusad dayon ug operasyon ang kapulisan ug nadakpan ang suspek didto sa iyang uma.
Positibo sab nga gitudlo sa kapuyo sa suspek nga gilugos niini ang iyang anak sa una niyang bana.
Gitakdang pasakaan og kaso sa kapulisan South Upi MPS ang suspek didto sa korte. (Edgar E. Fuerzas)