7 sikop sa drug den kasohan

PITO ka mga indibiduwal ang nasikop sa kapulisan human napuhag ang usa ka giingong drug den sa Purok 5, Barangay Southern Davao, Panabo City, Davao del Norte alas 11 sa gabii niadtong Sabado, Septiyembre 11, 2021.

Sumala sa Philippine Drug Enforcement Agency (PDEA) Davao nga target sa ilang buy-bust operation ang maintainer sa drug den nga usa ka alyas Butsoy, 42, kinsa Number 10 sa City Target Listed Drug Personality sa Panabo City.

Atol sa operasyon, naatlan sab sa kapulisan ang unom ka mga bisita sa suspek nga gituohang nanghithit sab og shabu niadtong mga taknaa.

Nakuha sa ilang posisyon ang 11 gramos sa gituohang shabu nga dunay street value nga P165,000.

Una niini, nakadawat og taho ang kapulisan sa talamak nga ilegal nga druga sa maong panimalay sa target nga suspek.

Kasong paglapas sa Article II sa Republic Act 9165 kon Comprehensive Dangerous Drugs Act of 2002 ang atubangon nga kaso sa mga dinakpan. (Jeepy P. Compio))