TINGKAGOL sa selda sa kapulisan ang usa ka lalaki nga nagtakin og armas alas 10:40 sa gabii niadtong Septyembre 11, 2021, didto sa Purok Madasigun, Barangay Zone-III, Sta. Cruz, Davao del Sur.
Ang Sta. Cruz Municipal Police Station nag-ila sa suspek nga si Victauro Agustin Palen, 47, drayber ug residente sa Bagumbayan, Barangay Zone-III.
Una niini, miabot ang impormasyon sa Sta. Cruz Municipal Police Station nga dunay lalaki nga nagtakin og armas, hinungdan nga daling girespondehan sa kapulisan.
Usa ka 20-anyos nga lalaki ang reklamante dihang miadto siya sa tindahan iyang nakita ang pusil sa suspek nga gipagawas niini gikan sa bag.
Sa kahadlok sa reklamante, midagan kini ug miabot ang mga pulis.
Nakuha sa posisyon sa suspek ang usa ka 9-millimeter Norinco dunay serial number B8004731, usa ka magazine loaded ug lima ka mga buhing bala.
Ang mga ebedensiya gidala na sa Philippine National Police Provincial Crime Laboratory Office sa Digos City alang sa ballistic examination, samtang giandam ang kaso nga atubangon sa suspek nga alarm and scandal ug kalapasan sa illegal possession of firearms and ammunition.
Wala pa sab mihatag og pamahayag ang suspek kinsa nadetinar karon sa Sta. Cruz Municipal Police Station. (Jeepy P. Compio)