NANAWAGAN ang Alyansa sa mga Mamumuo sa Sugbo-Kilusang Mayo Uno (AMA Sugbo-KMU) sa Department of Labor and Employment (Dole) ug Department of Health (DOH) nga mopatunga batok sa Executive Order (EO) 41 ni Gov. Gwendolyn ‘Gwen’ Garcia nga nagmando sa pagsul-ob og air purifiers sa mga kawani sa air conditioned ug poorly ventilated establishments aron tugotan nga mo-operate sa lalawigan.
Sa press statement kagahapon, Septiyembre 12, ang AMA Sugbo-KMU nagkanayon nga ang bag-ong mando dugang sagubangon sa mga kawani nga minimum-wage earners ug dugang pa, ang DOH wala morekomendar o wa magduso niini tungod sa kakuwang sa scientific evidence kon epektibo ba kini batok sa Covid-19.
Si Jaime Paglinawan, chairperson sa AMA Sugbo-KMU, nagkanayon sa ilang pamahayag nga kon ang kagamhanan sa lalawigan moinsister niini, kinahanglan sila ang mogasto sa pagpalit sa air purifiers, dili ang mga kabus nga kawani.
Ang AMA Sugbo-KMU nagduso sa pagpasar sa House Bill (HB) 9262 o ang 100 Daily Wage Subsidy Act ug ang HB 7909 o Paid Pandemic Leave Bill nga kabahin sa ubang demanda sa cash assistance.
Ang Dole 7, sa unang pakighinabi sa SunStar Cebu, niawhag sa mga tag-iya sa essential establishments sa Cebu Province paghimo og dialogue uban sa ilang mga kawani kon unsaon sa pagpatuman ang mando sa EO 41 ni Garcia.
Samtang, ang air purifers walay labot sa checklist sa pagsusi sa Dole 7. (WBS / PR)