“KON makamatngon ka nagsubay sa sayop nga dalan, kanunay dunay kahigayonan nga mobalik ug mangita og pamaagi nga makatultol sa insakto nga agianan.”
Kini ang pagtulun-an sa kinabuhi ni Alex (dili tinuod ngalan), gi-monitor nga bata ubos sa Pantawid Pamilyang Pilipino Program (4Ps). Siya nipaambit sa iyang kasinatian karon nga siya gikatakda nga mobalik sa pagtungha karong adlawa, Septiyembre 13, alang sa school year (SY) 2021-2022 isip Grade 9 human nibiya sa pagtungha sa SY 2018-2019.
Dihang nag-edad siya og 16, namaligya siya og gidiling druga ug nadakpan siya sa Special Weapons and Tactics (Swat) Team nga nironda sa ilang balay niadtong 2019.
“Dala sa among kawad-on, patay na akong papa, ug naa sa prisohan akong mama, usa kini sa mga rason ngano nabuhat nako ning mga butanga,” asoy ni Alex.
Si Alex maoy ikapito sa walo ka mga anak sa pamilya, ug siya ug ang iyang manghod nga babaye ang gibilin sa iyang apohang babaye human nabilanggo ang iyang inahan.
Ang iyang mga maguwang pulos na dunay pamilya.
Ang awtoridad nitunol kang Alex sa local social welfare office. Dayon, siya gibalhin sa Regional Rehabilitation Center for Youth (RRCY), pasilidad sa Department of Social Welfare and Development (DSWD) 7 nga gipuy-an sa children in conflict with the law.
Nagpuyo si Alex sa pasilidad sulod sa 11 ka buwan.
Si Alex niapil sa tanang kalihokan ug nisunod sa rules ug regulations nga gipatuman sa pasilidad.
Gipaubos siya sa counseling, guidance, ug tambag nga nakapaamgo niya sa pag-usab sa kinabuhi ug magsugod sa bag-ong kinabuhi.
“Sulod sa center daghan kog nakat-unan ug usa na didto ang kabahin sa Ginuo ug paglaum,” matod ni Alex.
Human sa 11 ka buwan sa RRCY, si Alex nigawas sa pasilidad niadtong Enero 2021 ug nibalik sa ilang dapit, diin nakita niya ang iyang inahan kinsa nigawas sa bilanggoan sa Oktubre 2020.
“Dinhi ko nakamatngon nga bati to ang akong gibuhat ug dili nako mousab pa sa illegal nga binuhatan ug molakaw na sa dalan nga sakto,” saysay ni Alex bahin sa iyang pagpuyo sa RRCY.
Ang inahan usab ni Alex nisaad sa bag-ong kinabuhi ug pag-atiman sa iyang mga anak lakip sa paglikay sa ilegal nga kalihokan.
Ning puntoha, si Alex nakahukom sa pag-enroll og balik sa tunghaan ug usa siya karon sa minilyon ka mga tinun-an sa SY 2021-2022 sugod karong adlawa.
“Samtang aduna pay panahon para magbag-o ug mag- eskwela, padayon gihapon kita aron makab-ot nato atong pangandoy,” matod ni Alex kinsa naglaum sa usa ka hayag nga kaugmaon ug dili na mobalik sa dulom nga kagahapon.
Dihang nagpaabot sa pag-abli sa klase, si Alex nitrabaho siya sa buwaran sa iyang uyoan sa pagtabang sa pamilya.
Si Alex ug ang iyang pamilya mapasalamaton taliwala sa kasaypanan human duna pay mga tawo nga ningtabang ug nagtuo sa ilang panaad sa pag-usab ug pagsugod sa bag-ong kinabuhi.
Uban sa mapadayunon nga pagdasig, suporta, tambag ug panginlabot, ang pamilya karon aktibo nga benepisaryo sa Pantawid Pamilya Pilipino Program ug kanunay motambong sa Family Development Sessions (FDS) aron pagpalig-on sa ilang pagkatawo nga ehemplo sa uban - dunay paglaum sa pagbag-o.(PR)