GIHATAG na sa Department of Social Welfare and Development (DSWD) 7 ang ayuda sa mga medical, burial ug laboratory assistance sa mga Oponganon niadtong Biyernes, Septiyembre 10.
Gipahigayon kini sa covered court sa Barangay Buaya pinaagi sa koordinasyon ni Kongresista Paz Radaza.
Moabot sa 187 ka mga benepisaryo ang nakadawat sa financial assistance nga mokantidad og P757,900.
Ang mga benepisaryo nakapasar sa interview sa mga personnel sa DSWD 7 human nga misumiter sa rekisitos sa buhatan sa kongresista.
Matag duha ka semana, ang paghatag sa salapi sa DSWD-7 sa mga benepisaryo kon mo-qualify sa ayuda, sumala ni Radaza.
Sukad sa pag-asumir sa kongresista niadtong 2019, moabot na sa kapin 2,000 ka mga benepisaryo ang nakadawat og burial ug medical assistance ubos sa iyang buhatan.
Nang-apud-apod usab ang buhatan sa kongresista og tag P1,500 matag karon ug unya ubos sa programang assistance to individuals in crisis situation (AICS).
“Gusto nako nga paspas gyud ang serbisyo mao personal gyud ko nihangyo nga every other two weeks ang releasing kay sayod ta nga lisod kaayo ang panahon karon,” matod ni Radaza sa Superbalita Cebu.
Una na usab ang DSWD 7, pinaagi sa buhatan sa kongresista sa bugtong dsitrito sa Lapu-Lapu, mao ang suhol sa mga batan-on nga nakatrabaho ubos sa programa sa departamento.
Ang Lapu-Lapu usa sa mga apektado sa yaas nga kaso sa Covd-19.(GCM)