GITANGTANG sa Commission on Elections (Comelec) ang upat ka mga konsehal sa siyudad sa Sugbo pinaagi sa pag-nullify sa ilang proklamasyon sa piniliay sa 2019. Apan magpabilin sila sa puwesto hangtod nga di pa final ug executory ang hukom sa Comelec en banc.
Ubos sa maong desisyon, gideklarar nga nulo sa pagkapili nila ni Konsehal Eugenio Gabuya Jr., Renato Osmeña Jr., Raul Alcoseba ug Phillip Zafra, pulos konsehal sa Cebu City south district.
Mag-iway kini sa dalan alang sa recount sa botos pabor ni anhing Atty. Marie Velle “Amay” Abella nga nidagan pagka konsehal sa Cebu City south district sa eleksyon sa Mayo 2019 ubos sa Bando Osmeña-Pundok Kauswagan (BOPK).
Hayan nga dunay matagak niining upat ka mga konsehal kon madeklarar nga mananaog si Amay Abella bisan pa kon namatay kini. Si Gabuya anaa sa ikalima nga puwesto, si Osmeña ikaunom, si Alcoseba ikapito ug si Zafra ikawalo nga labing apektado.
Pildi si Amay sa eleksyon sa 2019. Iyang gipasanginlan mao ang pagdagan ni Sherwin Luie Abella. Mipasaka siya og petisyon nga mideklarar ni Sherwin nga nuisance candidate.
Sa eleksyon sa 2019, si Amay nakakuha og 110,131 botos ug si Sherwin Luie Abella dunay 20,262 botos. Kon idugang ang iyang botos sa kang Amay, moabot kini og 130,393 botos. Si Zafra dunay 115,292 botos.
Namatay si Amay Abella sa Mayo 26, 2020 sa pancreatitis sa edad nga 37. Unsay mahitabo kon modaog siya sa recount sa Septiyembre 16? Ideklarar nga bakante ang iyang puwesto. Ang iyang partido, Liberal Democratic Party (LDP), mo-nominate og mopuli kaniya ug kinahanglan kining aprobahan sa presidente.
Matagak si Zafra nga nangiwit. Ang Barug ug BOPK dunay tag siyam ka konsehal. Apan ang sa BOPK mosaka gikan sa unom ngadto sa pito, wa pay labot sa ex-officio members, sila si ABC president Franklyn Ong ug Sangguniang Kabataan (SK) Federation president Jessica Resch.
Matod ni Konsehal Raymond Alvin Garcia, majority floor leader, ang upat magpadayon pa sa pagtambong sa sessions sa konseho.