SA mga dili suhito, ang lugar nga Hagakhakan daw ordinaryo lang paminawon. Way kalainan sa mga dapit kansang mga pangalan dili kaayo sinati o sikat.
Ang Hagakhakan maoy usa ka dapit nga nahimo na nga kabahin sa akong pagka bata hangtod na sa pagka ulitawo. Nasakop kini sa Barangay Punod sa lungsod sa Pinamungajan, Cebu. Sikbit ra ni sa silingang barangay sa Lut-od.
Nangutana ko kon unsay kahulugan sa pulong nga Hagakhakan, sa dihang gibisita nako og balik ang maong dapit subra sa 30 ka tuig ang nakalabay.
Dunay niingon nga tungod sa kasakaon sa maong dapit, mag-abot ang imong ginhawa mao nga hangak kaayo. Mao na hangak sa pagsinaka sa bungtod ug mao daw ang gibasihan pagkulit sa maong pangalan. Subayonon pa nako kon unsay tinuod nga kahulugan sa maong pangalan.
Basta sa ako lang mahinumduman nga mosaka na gani mi sa bungtod diin nahimutang ang karsada, ang among litukon kay padung mi sa Hagakhakan. Daplin sa karsada, may mga balay apil na mangumprahay kaniadto og duldo ug kabahiro.
Sa akong pagduaw sa maong dapit, duha na ka semana ang nakalabay, nangangha ko sa dakong kausaban. Gawas sa sementado nga karsada sa main road, sementado na sab ang karsada sa Hagakhakan.
Pagkasayon na pagsubida ug pagdulhug sa mga sakyanan. Taudtaod na diay naugmad ang karsada sa maong dapit.
Kaniadto yanuyanohon lang namo sa akong Lola Manol sa pagtadlas samtang naglukdo ko sa sako nga may sulod nga tipasi sa humay padung sa among pinuy-anan sa sitio Dakit, Barangay Poblacion, Pinamungajan.
Kinsay di mingawon ning dapita, nga nahimo nang kabahin sa akong pagpakabuhi ning kalibutana.
Sa kilid sa sementadong karsada sa Hagakhakan, mao ang yuta nga kabilin sa ginikanan sa akong inahan. Dili man hinuon dako kaayo, apan dasok sa mga punoan sa lubi, prutas, saging, duha ka punoan sa kawayan, ug mga lagutmon.
Salamat sa nitaliwan na nakong amahan, si Papa Dading nga nagkugi sa pananom.
Akong gipasalamatan si Mayor Glenn Baricuatro sa sementadong karsada kay basin dunay mga bisita nga gustong mosuroy sa maong dapit.
Kini ra bang dapita minutos lang ang gilay-on padulong sa wave pool sa Barangay Lamac sa samang lungsod.
Hinuon sa mga suhito sa maong lungsod, dili na ikapangutana kon unsa ka nindot sa mga karsada nga nagdugtong sa mga barangay sa bukid padung sa patag.
Sa akong mga kababata nga wa nako igkita sa akong kinalitkalit nga pagduaw, puhon, akong sigurohon nga magkita ta sa akong gikamingawan nga Hagakhakan.