ANG pandemiya sa coronavirus disease 2019 (Covid-19) padayong nakaapekto sa school year (SY) 2021-2022 nga moabli karong adlawa, Septiyenbre 13. Kon itande sa miaging SY 2020-2021, medyo arang-arang ning tuiga human nakaandam na ang Department of Education (DepEd). Sukwahi niadtong una nga nagkapuliki ang departamento sa pagpangita og pamaagi sa pagpadayon sa edukasyon taliwala sa krisis sa panglawas.
Ning tuiga, ang DepEd mopadayon sa blended learning o kombinasyon sa mga pamaagi, online o offline. Magdepende sa sitwasyon sa matag dapit. Ang regional offices giawhag sa pagpalambo sa Basic Education-Learning Continuity Plan (BE-LCP), lakip sa paggamit sa DepEd TV ug Radio-Based Instruction aron pagminos sa printed modules nga dugang gasto sa mga tinun-an.
Giawhag sa DepEd ang mga tinun-an nga nangundang sa miaging tuig tungod sa kalibog nga mobalik sa tungha ug ang pagseguro sa makatarunganong workload sa mga magtutudlo nga mosunod sa standards sa Magna Carta for Teacher labi na ning pandemiya nga nag-adjust ang tanang stakeholders sa edukasyon sa paghimo og mamugnaong pamaagi aron makahatag og epektibo nga pagtudlo ug dekalidad nga edukasyon.
Subay sa DepEd Order 029, series sa 2021, ang SY 2021-2022 karon, Septiyembre 13, ug motapos sa Hunyo 24, 2022. Duna kini 209 ka school days, lakip sa Sabado ug five-day midyear break. Sa private schools ug state o local universities ug colleges (SUCs/LUCs) nga nagtanyag og basic education, ang DepEd nagtugot kanila sa pag-abli sa klase sulod sa authorized period nga gilatid sa Republic Act No. 11480.
Samtang, ang DepEd walay mando sa face-to-face classes, partial o full-scale, ug dason sa departamento, gawas kon dunay dapit sa nasod nga gitugotan sa Presidente isip pilot areas. Kini ug daghan pang uban nga hagit ning pag-abli sa SY 2021-2022. Sagubangon nato kini. Good luck sa tanan!