GIANGKON ni Gilas Pilipinas coach Tab Baldwin nga nabalaka na siya human nga pipila sa iyang pambatong mga magduduwa ang ningpirma og kontrata aron moduwa sa gawas sa nasod.
Gipangtumbok mao sila si 7’3’ Kai Sotto, Thirdy Ravena, Dwight Ramos ug hasta si LeBron Lopez. Si Sotto moduwa sa National Basketball League (NBL) sa Australia, sila si Ravena ug Ramos naa sa Japan Basketball League samtang si Lopez moduwa sab og torneyo sa Amerika.
Adunay pagduhaduha si Baldwin kon makaduwa ba ang nangahisgutan alang sa kampanya sa Gilas sa first window sa 2023 Fiba World Cup qualifiers karong Nobiyembre, 2021.
Hinuon, malaumon si Baldwin nga aduna ra’y makuha ang Gilas nga ikapuli sa mga nangahisgutan kon dili kini makaduwa.
“We still believe that we can tap enough collegiate players to develop our roster which is very similar to what we’ve been doing for the past few months and we’re hoping to build the program around those players,” matod ni Baldwin sa interbyu sa Spin.ph.
Si Baldwin migamit og collegiate ug hasta high school stars sa pagporma og puwersa sa miaging third window sa 2021 Fiba Asia Cup qualifiers ug Fiba Olympic Qualifying Tournament sa Belgrade.
Ang maong puwersa nga naporma ni Baldwin maayo og gipakita sa maong mga kompetisyon.
Sa kasamtangan, ang Samahang Basketbol ng Pilipinas (SBP) aduna ra’y siyam ka mga magduduwa nga nakapirma kanila og kontrata. Kini mao sila si Isaac Go, Rey Suerte, ang kaluhang sila si Matt ug Mike Nieto, Allyn Bulanadi, Jordan Heading, William Navarro, Jaydee Tungcab, ug Tzaddy Rangel.
Ang nangahisgutan mao ra ang seguradong makaduwa sa Gilas sa kasamtangan.
“We’re looking at the level of development that our full-time players have,” pasabot ni Baldwin.
Asoy ni Baldwin nga posibleng manghuwam siya pagbalik og mga magduduwa sa Philippine Basketball Association (PBA) aron makatabang sa kampanya sa Gilas.
Plano ni Baldwin nga makigsabot sa PBA alang ning maong tinguha. Nagplano sab si Baldwin nga makigsabot sa JBL.
“We don’t expect that we’re going to be hurting for numbers for our pool and it’s still gonna be an optional situation depending on their contracts and again, depending to whether they’re going to add or subtract to our environment and chemistry,” dugang ni Baldwin.(ESL)