DUL-AN sa duha ka milyon ka mga tinun-an sa Central Visayas (CV) ang motungha karon sa pag-abli sa school year (SY) 2021-2022 sa mga publikong eskwelahan sa elementary ug high school sa nasod, Septiyembre 13.
Si Salustiano Jimenez, direktor sa Department of Education (DepEd) 7, nagkanayon nga lakip sa mga hagit nga ilang giatubang sa wala pa magsugod ang klase mao ang hagit sa matang sa enrolment ug budget.
“(We) need the data supposedly ahead, before the start of classes so that teachers can prepare well the needed materials; of course, budget, that’s why (we) need more engagement with stakeholders,” sigon niya.
Matod ni Jimenez, ang budget alang sa modules gikan sa central office nila nga gi-download ngadto sa regional office ug ngadto dayon sa schools division offices base sa datus sa enrolment.
Apan, matod niya, kinahanglan gihapon nila og budget alang sa ubang mga gamit sa eskwelahan sama sa mga alcohol, face masks, ug face shields nga gamitunon sa mga teaching ug non-teaching personnel tungod kay kuwang ra ang maintenance and other operating expenses kun MOOE.
Hapit moabot 82,000 ang total teaching ug non-teaching personnel sa DepEd 7, ug gikan niini duol 79,000 ang mga magtutudlo.
Ang overall enrolment, sumala sa quick count sa Learner Information System niadtong Sabado, Septiyembre 11, miabot na sa 1,877,857 kon 92 porsiyento sa total nga target sa DepEd 7 nga two million enrolees.
Sumala ni Jimenez, 114,693 niini enrolees alang sa pribado nga eskwelahan.
Matod hinoon niya, nagdahom pa siya nga madungagan ni tungod kay naandan man nga medyo uwahi na makasumitir o makahatag og final data sa enrolment ang mga pribadong eskwelahan.
Gidugang niya aduna nay ubang mga pribadong eskwelahan ang nag-abli ug nagsugod nag klase og una bisan wala pay Septiyembre 13.
Giasoy niya aduna usab mga ginikanan kon guardian nga anha na mopa-enrol inig sugod na gyud sa klase.
Samtang dugang niya unom sa hapit 70 ka mga pribadong eskwelahan nga temporaryong nisuspenso sa ilang operasyon niadtong miaging tuig, ang nibalik na og abli karong tuiga.
Kadaghanan niini kon upat gikan sa Cebu ug ang uban naa sa Bohol ug Negros Oriental.
Samtang matod usab niya, aduna nay mga nag-distribute na sa modules niadtong miaging mga semana samtang ang uban karon pa.
Gidugang usab niya anaa sa ubos sa 10 ka mga pampublikong magtutudlo ang active Covid-19 cases karon sa rehiyon.
Mahitungod usab sa pagpamakuna sa mga empleyado sa DepEd 7, si Jimenez nagkanayon nga dul-an 20,000 ka mga magtutudlo ang nakadawat na og first dose samtang 15,000 ang kompleto na sa bakuna.
“We reached 40 percent vaccinated both teaching and non-teaching personnel in Central Visayas (for regional office, 129 vaccinated out of 134 or 97 percent); 57 percent are awaiting for their schedule while around three to four percent still hesitant and we are still advocating,” dugang sa direktor.