POSIBLE nga tugutan sa lokal nga kagamhanan sa Davao City ang home isolation sa mga nagpositibo sa Covid, apan kadto lamang nakasinati og mild symptoms.
Kini ang gibutyag ni Davao City Mayor Sara Duterte atol sa regular niini nga radio programa sa Davao City Disaster Radio Lunes, Septyembre 13.
Apan gitin-aw sa mayor nga mapatuman lamang kini kung duna nay mogawas nga executive order (EO) gikan sa lokal nga panggamhanan sa siyudad, apan sa karon wala pa.
Giingon nga gipaabot na lang sab ang paggula sa guidelines base sa memorandum sa Department of Health (DOH) ug sa Department of the Interior and Local Government (DILG).
Gibutyag sab sa mayor nga nahisgutan na sab kini sa mga health district heads diha sa pagpangandam ugaling mapatuman kini.
Usa sa mga gihisgutan ang mga butang ug pamaagi kung dunay naka-quarantine sa usa ka balay.
Ipailawom suma pa sa lockdown ang usa ka balay nga dunay pasyente sa Covid ug monitoron kini matag karon ug unya sa mga taga Barangay Health Emergency Response Teams ingon man ang taga Operation Center (OpCen) sa Covid-19.
Gipaklaro sa mayor nga kung matigayon ang home Isolation alang lamang kini sa mga mild symptoms, dili puwede sa mga pasyente nga mga high risk, severe ug critical labi na kadtong mga nanginahanglan og oxygen ug medical attention. (Jeepy P. Compio/CheChe Diabordo KAMM Media Network)