TALIWALA sa padayon nga hulga sa Covid-19, ang pagbukas sa school year (SY) 2021-2022 nagsugod na Lunes, Septyembre 13, kon diin dul-an 1.2 milyon ka mga estudyante sa Davao Region nagpa-enrol sa ikaduhang tuig sa "blended distance learning," taho gikan sa Department of Education (DepEd)-Davao.
Si DepEd-Davao spokesperson Jenielito Atillo nagsulti pinaagi sa paghinabi sa radyo Lunes, Septyembre 13, nga gilauman nila ang kinatibuk-ang 1,176,606 basic education students mo-enrol sa publiko ug pribadong mga tulunghaan aron nga mobalik sa pagtungha.
Matud ni Atillo nga kini ang 91.3 porsiyento nga kinatibuk-ang population itandi niadtong miaging tuig nga 1,289,331.
Bisan og miingon siya nga ang kasamtangang ihap di makatupong sa ihap sa miaging tuig, apan kini "very good data" kay daghang mga ginikanan nagpalista na sa ilang mga anak una pa man magsugod ang kasamtangang SY.
"Nagstart ang klase last year, gamay pa lang ang nagpa-enroll. Pero nidagan ang bulan, nisaka ang enrollees. Karon, paspas ang pagsaka sa atong enrolment. Unta malampasan pa ang data last year," tug-an ni Atillo sa paghinabi kaniya sa 87.5 FM Davao City Disaster Radio.
Bisan pa sa pormal nga pagsugod sa SY sa tanang pampubliko nga tulunghaan sa rehiyon, gikanayon niini nga ang DepEd padayon nga nagdawat og mga enrollees sulod ning semanaha. Tungod niini, matud niya milaum sila nga dugang mga enrollees pa ang madugang. Bisan tuod nga pipila ka mga pribadong tulunghaan sa rehiyon una nang nagsugod.
Kini matud pa ang ikaduhang tuig kung diin ang DepEd mag-implementar sa learning distance modalities kay ang face-to-face (F2F) classes pabilin pang gisuspende taliwala sa padayong hulga sa Covid-19 pandemic.
Matud ni Atillo nga bisan kon nangandam na sila og mga tulunghaan sa rehiyon alang sa hinay-hinay nga pagbalik sa F2F nga klase, apan naghuwat pa gihapon sila og go signal gikan sa nasudnong kagamhanan.
Sumala niya nga ang pagpili og mga tulunghaan alang sa pilot F2F mag-agad sa qualifications gitakda sa DepEd.
Apan bisan pa sa mga hagit, gisulti ni Atillo nga dunay panginahanglan gihapon nga ipadayon ang pag-eskuwela ug kung kinahanglan nga magsagop og uban pang mga alternatibo.
"Kinahanglan nga kitang tanan magpadayon sa pagsibog gumikan kay education has to continue," dugang ni Atillo.
Sumala sa DepEd Order 29 series of 2021, ang unang grading gikansa September 13 hangtud November 12, 2021, samtang ang second grading gikan November 15, 2021 hangtud January 28, 2022, third grading gikan sa February 7 hangtud April 8, 2022, ug fourth grading gikan sa April 11 hangtud June 24, 2022.
Ang katapusan sa SY mahitabo gikan June 27 hangtud July 2, 2022.