ANAA na sa 18,562 ang kinatibuk-ang ihap sa mga kaso sa coronavirus disease (Covid-19) sa Cagayan de Oro human miubos ang ihap sa mga bag-ong kaso sa maong syudad.
Nakatala and Cagayan de Oro og 161 ka mga kaso sulod sa duha ka adlaw, duha niini locally stranded individuals (LSIs) ug 159 ang mga local transmissions.
Sumala sa report sa City Health Office, sa 159 ka mga bag-ong lokal nga mga kaso, 84 ang mga local index nga mga kaso, 46 ang mga close contacts sa mga pasyenteng nagpositibo sa coronavirus, 17 ang mga local authorized persons outside residence (Apors), pito ang mga Apors with link, ug lima ang mga patay.
Ang ihap sa mga aktibo nga kaso sa Cagayan de Oro aduna na sa 3,895.
Sa maong numero, 944 niini na-admit sa Northern Mindanao Medical Center ug uban pang mga ospital sa syudad, 2,936 ang mga outpatients, ug 15 ang mga ROFs/LSIs.
Nakatala usab og 34 ka mga Covid-positive nga mga kaso nga karon naka-recover. Anaa na karon sa 13,875 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 792.