Dili ikalimod nga nahugno ang boxing career ni world-rated super bantamweight contender “Prince” Albert Pagara human siya napasakaan og kasong pagpanglugos sa usa ka 14 anyos nga dalagita ug nabilanggo, dili pa lang dugay.
Moaway pa kaha og balik si Pagara?
Ang kanhi trainer ni Pagara sa nasirado nga ALA Gym nga si Edito Villamor mibutyag sa Superbalita Cebu nga pinaagi sa Facebook messenger, iyang gipangumusta si Pagara human kini nakagawas sa bilangguan pinaagi sa P100,000 nga piyansa.
Matod ni Villamor nga basi sa ilang chat ni Pagara, aduna pa’y poruhan nga mobalik og away ang lumad nga taga Maasin City, Southern Leyte nga boksidor.
“Wala man mi nag-estorya bahin atong nahitabo (kaso nga giatubang ni Pagara), more on boxing side ra,” pasabot ni Villamor.
“As a former trainer niya, ako siyang gipangumusta ug ako siyang gi-encourage nga dili mawagtangan og paglaom. Kon nakasala man gyud gani siya, kinahanglang iya nang atubangon.”
Gipasabot ni Villamor nga sa edad nga 27, taas pa og maabot si Pagara isip usa ka boksidor kon makasubay lang kini sa sakto nga dalan.
Batbat ni Villamor nga kon makadesisyon si Pagara nga mobalik og training, abli ang Villamor Brothers Boxing Gym sa pagdawat kaniya. Ang Villamor Borthers Boxing Gym gitukod ni Edito ug sa iyang iguong si Edmund ug nahimutang kini sa Pagsabungan, Mandaue City.
Hinuon sayod si Villamor nga dili sayon ang kasamtangang sitwasyon ni Pagara ug nagkinahanglan kini og makagiya kaniya aron hingpit nga makabangon.
“Ang importante karon para ni Albert mao ang guidance ug mahatagan siya’g second chance para mabalik ang iyang boxing career,” dugang ni Villamor.
Si Pagara, kinsa adunay 32-1, 23KOs nga rekord, mipirma og kontrata sa MTK Global ug D4G Promotions human sa pagsira sa ALA Gym.
Gipahibalo ni Pagara si Villamor nga makigsabot pa kaniya ang MTK Global ug D4G Promotions kabahin sa lakang nga ilang pagabuhaton sa umaabot.
Katapusang nakaaway si Pagara niadtong Disyembre 18, 2020 diin midaog siya batok kang Virgil Puton pinaagi sa unanimous decision sa IPI Compound sa Mandaue City. (ESL)