Nakita nako sa Facebook ang mga nagprotestang vendor sa Carbon market nga nagdala og gamayng placard nga ang gisuwat “Megawide Operation Demolition.”
Daw nakauyon ako sa maong punto kay dili man gyud unta angay magdalidali ang Market Operation Department sa Cebu City Hall sa mga demolition.
Hunahunaa ra gud. Naay gisang-at nga kaso ang Carbon Alliance sa korte aron ibalewala ang joint venture agreement (JVA) tali sa Megawide Construction Corp. ug ang Cebu City Hall.
Tungod kay bug-at ang mga basehanan sa maong kaso nga daghan gyud og sayop ang maong JVA, naghimo intawon si Bise Mayor Mayor Mike Rama og memorandum of agreement (MOA) aron matambalan ang maong mga sayop.
Nauyonan kining MOA sa mayoriya sa mga konsehal nga sakop sa Barug. Apan ang minoriya nga sakop sa BOPK “rescind” ang baruganan.
Karon, nagkahilis ra ba ang mayoriya sa Barug diha sa Konseho. Pila na lang ka semana kaha nga mabalewala ang JVA.
Bisan pa man og wala pa mapahimutang ang MOA, nagdalidali na man hinuon kining MOD og pagpa-demolish sa mga stalls diha sa luyo sa Unit 2 ug Unit 3.
Mao nga dili ko mahibulong nga gitawag ang MOD nga Megawide Operation Demolition. Daw dili na kawani sa Cebu City Hall ang MOD kay ang interes man sa Megawide ang giuna nila sa pagsilbi.
Kon buot natong tukion, ang gibuhat sa MOD nga gipangulohan niining nagbuot-buot nga si Market Administrator Irvin Cabales, dakong insulto sa mayoriya ug minoriya sa Konseho.
KINSAY TAG-IYA?
Apil ba diay sa Carbon Market kining bakanteng luna luyo sa Maritima building? Apil ba sab ang Senior’s Citizen Plaza nga atbang sa Cebu City Hall? Di ba ang Carbon Market kadto ra mang naa ang Unit 1, 2, 3 ug ang Barracks ug Freedom Park?
Di ba giangkon man kini sa Cebu Ports Authority (CPA) ug naa pa sa Court of Appeals ang kaso kon si kinsa gyud ang tag-iya sa maong dako nga area?
Apan nganong atat na man kaayo ang Megawide nga magtukod sa maong mga luna nga dili pa man klaro kon ang Cebu City Hall ba gyud ang tag-iya sa maong luna?
Bisag inyong lubagon ang CPA nga bakwi-on ang claim niini sa maong yuta, klaro man nga naa pa ang kaso sa Court of Appeals. Di ba hinuon nga matawag kamo og landgrabber kay nagbuotbuot na man hinuon mo sa pagtukod diha karon? (DM nako @anol_cebu)