SUPERBALITA CEBU

Nalzaro: Okey ra si Mayor Edlab

Saksi

DAGHAN sa mga Sugboanon ang nangutana karon kon nganong wala na magpakita sa publiko si Cebu City Mayor Edgardo Labella bisan pinaagi sa virtual press conference o pinaagi sa Facebook live. Gumikan niini, daghan ang mga huhungihong o mga tabi-tabi nga mitumaw nga seryuso na ang kahimtang sa panglawas sa mayor. Bisan ako nagduda nga basin og grabe ang gihambin nga balatian sa mayor.

Sukad sa iyang paggawas sa hospital niadtong miaging buwan, nga gani nabaniog nga namatay na siya, wala na magpakita sa publiko ang mayor. Mi-asumir tuod siya sa iyang trabaho apan work from home. O diha ra siya sa iyang panimalay nagtrabaho. Wala na gani siya magpahigayon og virtual press conference ug ang mga nanggawas niyang mga hulagway sa mga pamantalaan, gikuwestiyon gani.

Unsa ba gyud ang tinud-anay nga estado sa panglawas sa mayor? Ang akong nadunggan nga na-apektuhan ang iyang “speech” o sinultihan gumikan sa nasinati nga mild stroke sa dihang na-confine siya sa hospital og dugay-dugay. Dala usab kadto sa iyang sepsis nga diin matod niya kaniadtong nasakit siya sa Enero nga hapit siya mamatay.

Gawas sa iyang sinultihan nga medyo dili makalitok og tarung, naluya usab ang iyang lower extremities o mga tuhod ug maglisod og barug. Mao nga naka-wheelchair ang mayor ug nag-therapy. Apan kon naapektuhan ba ang iyang pangisip o panghuna-huna, matod pa sa akong tinubdan, nga wala. Lantip gihapon ang mayor ug maka-desisyon gihapon. Naa sa “process of recovery” ang mayor. Nisaad kini nga kon fully recovered na, magpakita na kini sa publiko.

Hinuon, makasabot man kita sa kahimtang sa panglawas sa mayor. Kinsa ba kanato ang dili masakit? Dili naman hinuon kinahanglan nga mo-report siya matag adlaw ngadto sa City Hall. Bisan og tuod aduna siyay gihambin nga balatian, ang importante maayo gihapon ang iyang pangisip ug siya gihapon ang nagpadagan sa mga kalihukan sa balay lungsod. Ato lang panghinauton nga maka-recover dayon ang mayor sa iyang kahimtang karon ug mobalik ang ang kabaskog sa iyang panglawas. (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!