Karon panahona tungod sa nagsingabot nga eleksyon, kon magsige ka og sunod sa inadlaw nga balita nga gikan sa kagamhanan ug kalihokan sa mga opisyal, morag nisamot og kagubot atong sitwasyon, labina aning nagpadayon pa nga pandemya sa Covid-19. Si Presidente Rodrigo Duterte ug iyang mga sakop sa Kabinete nagsige og bunal sa mga senador, labina ni Sen. Dick Gordon, chairman sa Senate blue ribbon committee, nga nag-imbestigar sa pagdaug sa Pharmally Pharmaceutical sa bidding sa minilyon nga supply sa facemask, face shield.
Atong sabton nga si Duterte, abogado, kanhi mayor ug kongresista, nakahibawo ug nakasabot sa trabaho Sa senado, nga dunay katungod ug obligasyon ubos sa Batakang Balaod sa pag-imbestigar sa mga isyu batok sa mga opisyal sa opisina ubos sa ehekutibo aron magpanday og balaudnon nga makorehian ang mga posible nga sayop, labina sa paggamit sa pundo sa kagamhanan.
Apan kay ang opisyales sa Pharmally mga kaila man ni Presidente Duterte, labina na ni Michael Yang, nga iyang kanhi economic adviser, mao nga di kalikayan nga moalburoto ang iyang utok bisan kon ang mga senador wa pa moingon nga dunay posible nga kalambigitan ang opisina sa Presidente.
Tungod aning imbestigasyon nga gipahigayon sa Senate blue ribbon committee, nga gipangulohan hi Senador Gordon, nga siya usab ang chairman sa Philippine National Red Cross (PNRC), usa ka pribado nga organisasyon ug dili ubos sa gobyerno, gusto nga ipa-awdit ni Duterte sa Commission on Audit (COA).
Apan si Michael G. Aginaldo, chairman sa COA, dili moawdit sa PNRC tungod kay, matud pa niya, walay hurisdiksyon ang commission sa PNRC kay dili ubos sa kagamhanan.
Bisan pa sa mga birada ni Presidente Duterte og mga hait nga pulong ngadto nila ni Senador Gordon ug Senador Franklin Drilon ug sa iyang hulga nga undangon ang mga transaksyon sa iyang administrasyon ngadto sa PRC, ang mga senador dili moundang sa ilang imbestigasyon sa pagpamalit sa mga gamit ug himan alang sa pagbatok aning pandemya sa Covid-19gikan sa Pharmally maoy nakakuha sa total nga P8.6 bilyunes nga kontrata.
Matod ni Drilon ang Pharmally mikita og P393 milyunes nga ginansya sa mga kontrata sa kagamhanan gikan niadtong Abril hangtud sa Hunyo 2020. Pung pa ni Drilon nga ang Pharmally usa ka trading company,dili manufacturer ug namalit lang sa mga produkto ug gibaligya sa atong nasud. Ang iyang pangutana, nagbayad ba ang Pharmally sa 12 percent value added tax ug income tax sa ilang naginansya?
Ang maayo nga imong pangutan-on, Senador Drilon, mao ang Bureau of Internal Revenue kon nagbayad ba ning Pharmally sa VAT ug kon nisumitir ba sa ilang income tax return.