Gibutyag sa deputy officer sa Local Vaccination Operations Center (LVOC ) sa Dakbayan sa Lapu-Lapu, James Sayson, nga ila na karon nga gipinalisar ang mga paagi kalabot sa paghatag og mga discount sa supermarkets ug grocery stores sa dakbayan sa mga bakunado.
Matod ni Sayson, usa kini sa lakang nga mas maaghat ang mga Oponganon nga magpabakuna.
Gipadayag niya nga dili na unya kini kinahanglan og ordinansa o resolusyon sa konseho sa dakbayan sanglit pagtugot lang gikan sa Department of Trade and Industry (DTI) ang kinahanglanon niini.
Nanghinaot ang opisyal nga mapinalisar na kini sulod sa usa ka semana.
Ang maong lakang dugang paagi sa dakbayan aron mapaspasan ang pagkab-ot sa herd immunity nga sa pagkakaron ana na sa 52 ngadto sa 53 porsiyento.
Sa Septiyembre 13, pormal na usab nga gibuksan ang drive-thru vaccination sa dakbayan sa Liberty Shrine sa Barangay Mactan. Mao na kini ang ika-10 nga vaccination site sa dakbayan.
Karong Septiyembre 15, magpahigayon usab og pamakuna sa merkado publiko sa dakbayan.
Gibutyag sa opisyal nga mahimong makapahimulos usab sa maong drive-thru vaccination ang naka-schedule sa ilang second dose.
Ipakita mao lang ang ilang vaccination card ug ID.
Ang magpabakuna sa first dose kinahanglan magparehistro aron makakuha ug QR code.
“Naa man tay list sa second dosers so mangayo pud tag gamay sa ipang brand (sa bakuna) ngari para ug naay ganahan ari mahimo ra,” matod ni Sayson. (GCM)