Moabot ngadto sa 112 ang nadakpan sa kapulisan sa Siyudad sa Sugbo sa usa ka adlaw nga simultaneous anti-criminality law enforcement operation (Sacleo) sa Sabado, Septiytembre 11, 2021.
Sa illegal nga drugas, nakasikop sila og 39 ka drug personalities sa 36 ka operasyon diin unom niini nalakip sa high value individual ug P1.3 milyunes ang nasakmit.
Samtang, 73 ang nadakpan sa 38 ka operasyon batok sa illegal gambling diin ang labing daghan niini nasikop sa tigbakayan ug nasikop ang 16 ka tawo nga naghupot og armas nga walay lisensya.
Matod ni Police Lieutenant Colonel Wilbert Parilla, deputy city director for operation sa Cebu City Police Office (CCPO), nga ilang gihingusgan karon ang pagsakmit sa loose firearms.
Sa talaan sa operasyon, dunay kapin sa 3,000 ka mga armas nga ni-expire na ang lisensya, gumikan niini, magsugod na usab sila sa ilang Oplan Katok aron hangyuon ang gun holders nga wala na ma-renew ang lisensya nga i-turn over kini sa labing duol nga police station. (AYB)