KAPULISAN sa Siyudad sa Sugbo mihatag karon og ultimatum sa bikers nga kon padayon nga dili motuman sa lagda sa Kagamhanan sa Dakbayan, ilang irekomendar nga hunongon lang una ang leisure biking.
Niadtong Sabado, Septiyembre 11, 2021, moabot ngadto sa 20 ka bikers gipang isyuhan og citation ticket dihang naatlan sa mga sakop sa Traffic Enforcement Unit sa Cebu City Police Office (CCPO) nga wala nag mask samtang nagbisikleta.
Matod ni Police Lieutenant Colonel Wilbert Parilla, deputy city director for operations sa CCPO, nga siya mismo ang nakasaksi sa dihang misaka siya sa Brgy. Busay.
Pasabot ni Parilla nga ang pagpasul-ob sa mga biker sa mask samtang nag bisikleta gituyo aron malikayan nga bisan asa nalang mangluwa ug mapiskan na hinuon ang nagsunod kaniya.
“If we found out nga daghan gyud kaayong mo-violate nga dili gyud gihapon motuman, then we will request the EOC nga mausab ni atoang lagda nga pwede nato nga i-request nga iundang usa nato ang atoang biking considering nga daghan ang dili mopatuo,” matod ni Parilla.
Bisan pa ang mga trabahante nga mogamit og bisikleta sa ilang pag-adto sa trabaho, kinahanglan nga naka mask ug kon masugatan sa mga pulis dakpon kini ug isyuhan og citation ticket.
Lakip sa nabantayan ni Parilla atol sa iyang pagbisita sa Busay nga daghang bikers nagtapok sa usa ka tindahan aron mopahuway ug nangaon.
Ang panagtapok sa gibana-bana 150 ngadto sa 200 ka mga biker klarong kalapasan sa social gathering bisan kon gipaubos na sa general community quarantine (GCQ) ang dakbayan sa Sugbo.
Gipatawag na usab ang attention sa mga tindahan sa Busay sa City Environment and Sanitation Enhancement Team (CESET) nga limitahan lang ang ilang mga kustomer.
Apan kon padayon nga dili motuman ang maong mga tindahan, ilang irekomendar sa Business Process and Licensing Office (BPLO) nga isyohan og revocation sa permit.