SECTIONS
Pampanga
Monday, September 27, 2021
PAMPANGA

Garcia: Bayani ning Kasalungsungan (Present-day Heroes)

Kapisik

“Frontliner ku.

Akung sasabak

king pamanantabe

karing masakit.

Sakit da makayawa.

Makatakut.

Mimingat ku mu.

Pasiknangan ku ing lub ku.

Titiman ku mu parati.

Ala kung akarapat.

Frontliner ku.

Akung magsikan lub

king pamanese karing masakit.

E ku sa'makayawa.

E ku sa'akatakut.

Pakaingatan ku mu.

Dapat masikan ku lub.

Dapat parating makatiman.

Dapat sikan ing lub ku.

Frontliner ku mu.

Akung sasabak da

king pamagbante karing masakit.

Sakit a makamate.

E ku kanu dapat tumakut.

Alang akarapat nung e mu mingat.

Sana mu pin makatiman ku pa.

Sana mu pin matibe ing lub ku.”

-- Dalit Frontliner, Miguel Serrano

***

Deng bayani kalupa ta la mung taung atin mu namang kapanamdaman anti itamu inya byasa la namang magal, mangayna, tumakut, kumaynip, maniglo karing karelang pakamalan at la anti karing bayaning ayayalben tamu keng sine. Panamdaman da naman ing puyat at ing alang paynawa nung e mu ing mag-CR a sabi da pin kareng report -- sasala la naman uling tutung asna kasakit ing mapagal na la keng obra, mapagal la pa keng pamiganaka karing karelang pakamalan at pibale-bale. Papagal lang dili keng kakulangan pagasa king bye.

Deting frontliners a tubu karing lalawigan asno kasakit kabilyan. Mao-homesick la namsn dapot pekamasakit la kabiltan. Bang makauli la king lalawigan da kaylangan dang pa-swab test balang mumuli la. Nung mag-positive la e la malaus muli. Buri na sabyan nita kaylangan dang gumastus balang mumuli la. Pati saken da dapat kuma lang siguradung ing driver ala yang sakit, nung ali miyawa la. Inya pin mamayad lang saken a solo da ba’la mung makauli karing pamilya da. E biru ing gastus da balang mumuli la. Makanyan man ing pamanuli balang dayoff dang makaba ya namung makabye karelang kapasnawan, nung e man e mu asali o e mu abayarang tula para karela.

Ninu man, nung aldo’ldo namu akakit mu masakit, ating akakabyusan da ing sakit at atin mu namang ali da na inya sa’t ita ing mamye kaplas balat karela. Neng deng kamaganak da e da la man ayayantabayanan king pangarate da keng sakit at mekad pengari da la reta. Atin mu naman a ding anak da ilang e da atatanuran at antabayanan kabang masakit la reti.

Atin mapilan karela ing miyawa karing masakit a antabayanan da at ita maging sangkan inya lalu lang mikakarapatan ituring anting tune bayani uling tataya da ing bye da para kareng aliwa. E la mu ditak ding meyangu bye karela uli ning pamanyaup bang mipaldan la reti dapot mesaul la at yang meging sangkan ita bang ikapatad da naman inawa at miyabe karing bilang da ring mengamate pauli ning sakit a makayawa.

Sukat lang miparangalan deng frontliners nung e no man aytas sweldu ning gubyernu anti king tinggap dang nabang kapilan.pa agyang asna kalati o karitak mu ing tinggap da. Bala mu pin asnong makalunus.

Lwid la ryng jk.

***

Dake Talabaldugan

mipasamul (pangdiwa) sinamul, misubu, minakmul pirapal, e sasaryan o ala king pamalak. English: swallowed something hastily accidentaly. Alimbawa king pamangamit: “Agyang makayarap ya karing dakal a tau ing pangane nang Peping mipasamal yang dakal uling asne kaburi karing makayapag a pagmayumu king tau ning makibale.”

mipasamut (pangdiwa) sinamut, mipayabe, mipasikisik bigla agyang e sasaryan o e binalak. English: mingled with some people unintwntionally or unplanned. Alimbawa king pamangamit: “Keng pamamiragli nang Eloi mipasamut ya kareng aliwang talapagaral a e na kalupa pipagaralan inya mitawli ya keng pamagtas watawat inyang Lunis.”

mipasamsam (pangdiwa) sinamsam bigla a e sasaryan o alang pamalak. English: captured, caught, grabbed or took away something from someone hurriedly unintentionally or unplanned. Alimbawa king pamangamit: “Atin papyalung king pyesta king Paralaya inyang mipasamsam ya king dakpanan bigak i Landu agyang e ya man kayabe karing makalistang makisamsaman inya kingwa de kaya ing asamsam nang bigak.”

mipasamwak (pangdiwa) mesamwak, mesalawla, mirinatang labis bigla pauli ning kelang pamingat. English – messed up, got contaminated or corrupted fast due to negligence or carelessness Alimbawa king pamangamit: “Mipasamwak tambing ing pamangan a tau da ri Kari neng e na tingkapan inya pengan da reng pusa e pa man miyapag. “

mipasangab (pangdiwa) sinangab biglang e sasarayan o e binalak. English – sniffed, smelled something unintentionally. Alimbawa king pamangamit: “Agyang e mu buring abau ing banglu ding bulaklak king mula nang Osang akwa mu pa mu ring mipasangab neng sasalingalngal la.”

***

Sadyang gawi at amanu da reng Kapampangan

Deng bulaklak ding tukal asno karakal sadya karing dayatan at mamye lang legwan at banglu king kapaligiran pauli ning makapagmulala dang kalikasan. Deting bulaklak s reti agyang asna kaburak o asna karinat nung nunla tinubu e la midarame king nanu mang kelanglegwan at e mayap a kabilyan ning tibwan da.

Deng bulung da reti malapad lang asna kakule aluntyan a malagu. Kakasna ya ing sapa o ligawan a tibwan da at ding lalabas e da akwang e mipalawe king karelang legwan. Agya mang keraklan kekatamung Kapampangan e ta la kakanan ding tukal—deng aliwang lalawigan gugule da la ding bulaklak at tangke at pati na ding bulaklak da.

Kakanan da la ring tau aliwang bangsa deng butul da reti anting mani.

Kasalungsungan, deng tukal diritak na la karing sadya dang santungan at ditak-ditak na lang makakalingwan karing bayung dai.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!