MIBALIK na sa pagtungha ang kapin 24 milyunes ka mga tinun-an nga naka-enroll sa mga pribado ug pampublikong tunghaan sa Pilipinas sa school year 2021-2022.

Sa pag-abli sa mga klase niadtong Lunes, Septiyembre 13, gipasigarbo ni Education Secretary Leonor Briones ang ikaduhang higayon nga napadayon ang pagtungha sa mga estudyante bisan pa man sa pandemiya.

Alang kang Briones, ang pag-abli niadong Lunes usa ka selebrasyon sa kalampusan sa miaging school year.

Padayon gihapon ang pagpanghatag og modules ug paglambo ug digital learning tools inay nga mag-inatubangay sa classroom ang mga bata ug magtutudlo nunot sa pagsuspenso sa mga klase labaw na nga dunay mga nadiskubrehan nga bag-o ug mas makatakod nga Covid-19 variants.

Usa ang Pilipinas sa lima ka mga nasod sa kalibutan nga wa pa mitugot sa in-person o face-to-face classes sukad sa pagsugod sa pandemiya matod pa sa United Nations Children’s Fund (Unicef).

Adbokasiya sa maong organisasyon karon ang panawagan nga magsugod na og pagre-open sa mga tunghaan sa low-risk areas ingon man ang paghimo og komprehensibo nga recovery response alang sa mga estudyante.

Dugang pa sa Unicef nga maglisod sa pagtungha ang mga batang tinun-an pinaagi sa remote learning tungod sa kakuwang sa kahimanan ug suporta sa paggamit sa teknolohiya, poor learning environment, pressure nga mohimo sa mga buluhaton sa panimay, o pagpugos kanila nga manrabaho inay nga moeskwela.

Nanawagan sab ang Unicef nga hatagan og suporta ang mga magtutudlo sa pag-incorporate sa digital technology sa ilang pagtudlo.

Gikwestyon sab sa pundok nga ACT ang pagtan-aw nga kalampusan ang pagsuspenso sa pag-abli sa mga tunghaan nunot sa mga suliran nga giatubang sa mga tinun-an, ginikanan ug magtutudlo sama sa access sa gadgets, igong internet support, ug problema sa modules.

Sa bahin sa National Economic and Development Authority o NEDA, gibana-bana nga moabot sa P11 trillion ang productivity losses sulod sa sunod ka kwarenta ka tuig diri sa Pilipinas kon magpadayon ang delay sa face-to-face classes.

Ang dekalidad ug accessible nga edukasyon ug pagsiguro nga maayo ang kahimtang sa ilang panglawas mga katungod sa mga batang Pilipino.

Sa pagbalanse sa mga nagdumala sa atong nasod sa maong mga katungod, gipanglantawan nga dunggon usab ang habig sa mga nagsugyot nga mahibalik sa hingpit ang face-to-face classes labaw na sa mga lugar nga menos ang insidente sa Covid-19.

Sa padayon nga pagsaka sa mga kaso sa Covid-19 sa atong nasod, kinahanglang magkahiusa ang tanan sa pagpahimutang sa mga bata sa pagdugang sa ilang kaalam ug paglikay sa virus.

[Lindog sinuwat ni Atty. King Anthony Perez, usa sa mga abogado sa Children’s Legal Bureau. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]