Barrita: 2020-2021 Bar exams digital, way topnotchers

IPAHIGAYON ang 2020 ug 2021 Bar examinations sa upat ka Dominggo sa Nobiyembre -- 7, 14, 21 ug 28. Mao kini ang kinadak-ang Bar exams kay idungan ang batch sa 2020 ug 2021. Ang bar exams sa 2020 nakanselar tungod sa Covid-19 pandemic.

Sa labing unang higayon, himuon kini nga digital. Ang mga mokuha sa bar magdala sa ilang kaugalingong laptop, ginamit ang software sa Supreme Court. Si Associate Justice Marvic Leonen, ang Bar chairman, niingon nga giaprobahan sa SC en banc ang usa ka digitalized, localized and proctored bar exams.

Di na maproblema kadtong mga batig sinuwatan nga morag agi sa itik kay isuwat na man sa laptop ang ilang tubag. Matod pa sa usa ka propesor sa kolehiyo sa abogasiya, ang bentaha sa batig agi mao nga di mabasa ang sayop nga tubag, apan ang disbentaha kay di sab mabasa ang saktong tubag.

Apan ang examinees kinahanglan gihapon nga moadto sa usa ka testing room sa labing menos 24 ka testing centers sa lainlaing dapit sa Pilipinas. Ang testing room, bantayan sa proctors ug surveillance cameras.

Ang examinees makapili sa testing center nga labing duol sa ilang pinuy-anan aron kamenosan ang ilang gasto. Sa Central Visayas, upat ka mga eskuylahan ang napili nga testing centers.

Sa Cebu City, mao kini ang University of San Jose Recoletos-Basak Campus nga dunay maximum capacity nga 600 ka examinees, ang University of Cebu School of Law nga may capacity alang sa 1,000 ka examinees ug ang University of San Carlos School of Law and Governance nga may capacity alang sa 200 ka examinees. Samtang sa Dumaguete City, ang Silliman University College of Law may capacity alang sa 1,000 ka examinees.

Samtang sa labing unang higayon, di na ipahibawo sa Korte Suprema ang top 10 passers sa bar exams karong tuiga. Inay sa top 10, ipagawas sa Korte Suprema ang ngan sa mga examinees nga nakakuha og grado nga labing menos 85 porsyento isip pag-ila sa ilang “exemplary performance” ug ilista sila alphabetically.

Matod pa ni Justice Leonen, kanhi dean sa University of the Philippines College of Law, “The bar examinations measure individual knowledge. It is no race or competition. Neither will it predict who among the examinees will become the best qualified within their batch, the better lawyer, the more relevant practitioner or the more compassionate individual.”

Sa 2019, 2,103 o 27.36 porsyento sa 7,685 ka bar examiness ang nakapasar. Ang usa ka examinee kinahanglan nga makakuha og labing menos 75 porsyento aron makapasar sa Bar exams.

Karong tuiga, gilimitihan ang Bar exams sa kada subject og 18 ka “straightforward questions” ug way subquestion. Subay sa Rules of Court, dunay walo ka subject ang bar exams—remedial law (20 percent), political and international law (15 percent), civil law (15 percent), commercial law (15 percent), labor and social legislation (15 percent), criminal law (10 percent), taxation (10 percent) and legal ethics and practical exercises (5 percent).