NAKALIPAY ug naghatag og paglaum sa sektor sa pamatigayon ang Executive Order (EO) 138 ni Bise Mayor Michael Rama, atol nga acting mayor dihang nag-leave si Mayor Edgardo Labella, kabahin sa pagtugot sa mga kan-anan nga makapa-dine-in na sa mga kompleto sa bakuna batok sa Covid-19 apan 30 porsiyento lang sa ilang kapasidad ug takeout lang sa wala pay bakuna o adto mokaon sa gawas nga lamisa.
Ug tungod sa EO 138 ug pagpaubos sa status ngadto sa general community quarantine (GCQ) gikan sa modified enhanced community quarantine (MECQ), ang kita mga kan-anan gikatahong miarang-arang. Matod ni Chamber of Commerce and Industry president Felix Taguiam, nahimo kining modelo sa ubang dapit sa nasod sa pagpabalik sa ekonomiya taliwala sa pandemiya.
Dason ni Taguiam, ang konsepto gikonsiderar ni Presidential Adviser for Entrepreneurship ug Go Negosyo Founder Joey Concepcion sa ilang virtual nga tigom kabahin sa Public-Private Dialogue on Safe Ways to Open the Economy in the Age of Quarantines niadtong Lunes, Septiyembre 13.
Gawas sa hinayhinay nga pagpahiuli sa ekonomiya, mag-ingganyo usab kini sa katawhan nga magpabakuha tungod sa daghang benepisyo nga masinati. Sa maong pamaagi, mopaspas ang programa sa pagpabakuna. Madali ang pagkab-ot sa herd immunity alang sa pagsanta sa pagkaylap sa virus ug hingpit mapatuman ang bag-ong normal.
Apan, si Department of the Interior and Local Government (DILG) Secretary Eduardo Año nikomentaryo atol sa usa ka forum nga ang “no vaccination, no dine-in” policy sa Dakbayan sa Sugbo walay pagtugot gikan sa Inter Agency Task Force (IATF) hinungdan nga iyang ipasusi kini. Kinahangalan ba tanang EOs sa lokal nga kagamhanan bahin sa Covid may pagtugot sa task force bisan nagpatuman gihapon sa minimum health standard?
Maayong maklaro kini aron dili mahimong pahoy ang lokal nga kagamhanan sa ilang mga paningkamot taliwala sa hulga sa virus.